Loading ...
Diplomati më i lartë i Iranit ka deklaruar se çdo marrëveshje paqeje me Shtetet e Bashkuara do të kërkojë tërheqjen e forcave izraelite nga Libani, ndërsa presidenti amerikan Donald Trump ka kritikuar publikisht Izraelin për veprimet e tij ushtarake në rajon.
Ministri i Jashtëm iranian, Abbas Araghchi, tha se lufta nuk mund të konsiderohet e përfunduar pa largimin e trupave izraelite nga territoret e pushtuara gjatë konfliktit.
“Pa tërheqjen e forcave izraelite nga territoret që ato pushtuan gjatë kësaj lufte, lufta nuk ka përfunduar plotësisht”, deklaroi Araghchi.
Sipas një zyrtari të Hezbollahut, Irani ka dhënë garanci se do të kërkojë zyrtarisht tërheqjen e Izraelit nga Libani në fazën e ardhshme të negociatave me SHBA-në.
Ndërkohë, gjatë samitit të liderëve të G7, Donald Trump kritikoi kryeministrin izraelit Benjamin Netanyahu, duke i kërkuar të tregojë më shumë përgjegjësi në Liban.
“Izraeli ka luftuar Hezbollahun për shumë kohë dhe po humbin jetën shumë njerëz. Nuk është e nevojshme të shkatërrosh ndërtesa të tëra banimi për të kapur një person”, tha Trump, duke e cilësuar si “të egër” një sulm të fundit izraelit në Bejrut.
Presidenti amerikan la të kuptohet se po humbet durimin me refuzimin e Izraelit për të pranuar një armëpushim, duke paralajmëruar se kjo mund të rrezikojë marrëveshjen 60-ditore të armëpushimit që Uashingtoni ka negociuar me Teheranin.
“Pa SHBA-në dhe pa mua nuk do të kishte Izrael, sepse askush tjetër nuk do të bënte atë që kam bërë unë”, u shpreh Trump.
Sulme të reja në Liban
Të martën, sulmet me dronë izraelitë në Liban lanë të paktën katër persona të vdekur. Mediat lokale raportuan se një automjet u godit fillimisht në fshatin Mayfadoun, ndërsa një sulm i dytë u krye pasi banorët dhe ekipet e ndihmës u mblodhën në vendngjarje.
Plani 300 miliardë dollarësh për Iranin
Në qendër të negociatave ndodhet edhe një plan investimesh prej 300 miliardë dollarësh nga shtetet e Gjirit në ekonominë iraniane. Fondi do të aktivizohet vetëm nëse Irani përmbush kërkesat për çmontimin e programit të tij bërthamor dhe heq dorë në mënyrë të verifikueshme nga zhvillimi i armëve atomike.
Nënpresidenti amerikan JD Vance deklaroi se fondi nuk do të financohet nga SHBA-ja, por do të shërbejë si mekanizëm për investime tregtare nga vendet arabe të Gjirit.
Burime iraniane bëjnë të ditur se marrëveshja parashikon uljen e nivelit të pasurimit të uraniumit në 3.67%, nivel i pranueshëm për përdorime civile, ndërsa ruan të drejtën e Iranit për pasurim të uraniumit brenda territorit të tij.
Ndërkohë, liderët evropianë kanë shprehur shqetësime për mungesën e detajeve në marrëveshje dhe për ndikimin që tensionet e vazhdueshme mes Izraelit dhe Hezbollahut mund të kenë mbi stabilitetin e armëpushimit dhe sigurinë rajonale.
