Kryesore
nev ila20:19 | 02/04/2020
Ish-kryeministri Sali Berisha gjatë lidhjes me skype me gazetaren Mirela Milori në ABC News lëshoi akuza të forta për ministren e shëndetësisë Ogerta Manstirliu. Sipas Berishës shifrat në Shqipëri për të infektuarit me covid-19 janë të manipuluara. Berisha tha se ka të dhëna se kjo shifër e raportuar nga Ministria e Shëndetësisë është të paktën 10 herë ose 15 herë më shumë seç është raportuar.
Mirela Milori: Çfarë shifrash keni, sipas të dhënave tuaja?
Sali Berisha: Janë të paktën 10 ose 15 herë më shumë sec është raportuar. Në Has sot, në Krumë është një lagje e tërë e infektuar me covid-19. Kanë vdekur 3 persona. Edhe në rrethe po ashtu. Për të qenë i vdekur nga covid duhet patjetër të ndërrosh jetën në spitalin Infektiv….
Vijon…/abcnews.al
in a20:12 | 02/04/2020
Në një lidhje me “ABC News” ish-kryeministri Sali Berisha ka folur për situatën e shkaktuar nga koronavirusi.
Berisha u shpreh se shifrat e publikuara për rastet e perosnave të prekur nga COVID-19 dhe personat që kanë humbur jetën, nuk janë ato të saktat.
Gjithashtu ish-kryeminstri hodhi akuza ndaj kryeminstrit Rama se po shkakton panik te qytetarët me qëndrimin e tij.
“Është një pandemi unike, në një 100 vitet e fundit që nga koha kur ishte gripi spanjoll. Jemi në fillimet e saj. Është shumë e vështirë të parashikohen përmasat e pasojave në shëndetin e njerëzve. Përveç disa shpresave me kombinim ilaçesh, ende nuk ka një vaksinë”, deklaroi Berisha.
Mendoni se kemi hyrë në zonën e rrezikut apo do të jemi me këto shifra?
Berisha: Në shqipëri ndodh ajo që përveç Koresë së Veriut nuk ndodh në asnjë vend tjetër. Shifrat këtu për të vdekurit nga viroza COVID-19 përcaktohen politikisht. Çdo shifër, çdo veprim është politizuar, këto i them shumë të faktuara.
Keni shifra të tjera nga ato zyrtaret?
Berisha: Të besosh se ka 277 të prekur është qesharake, këtë nuk e beson njeri. Kur jemi vendi që kemi bërë shumë pak teste.
Na citon një nga kryeterriostët e kohës në postimet e tij. Në këtë epidemi në kemi një rrezik i lartë, vjen nga i vetëshpalluri kryeepidemiolog dhe nga një grusht njerëzish. E quaj “ndrikull hajnia”. Me këtë qëndrim nuk po bëj politik, por po them të vërtetën për qytetarët.
Çfarë po ndodh me testet?
Berisha: Ndrikull hajni i tha qytetarëv3e se po përdornim metodën e vjetër të OBSH, metodë e cila ka 15 ditë që e ka hedhur poshtë.
Shqipëria pardje ishte në 10 vendet në vdekshmëri më të lartë në botë, sot është në vendin e 11 ose të 12. Shqipëria vetë ka një vdekshmëri prej tre herë më të lartë se mesatarja e rajonit. Garantoj që shifrat janë të manipuluara”, tha Berisha./abcnews.al
nev ila18:45 | 02/04/2020
Kryeministri Rama ka reaguar pas deklaratës së Partisë Demokratike e cila akuzoi kryeministrin se nisma për të ndaluar pagesën e qirasë nga qiramarrësit të bizneseve të mbyllura, do të nxisë konflikt social mes shqiptarëve.
Rama shkruan se akti normativ po bëhet gati dhe se do të shpjegojë sonte në mbrëmje më tepër në lidhje me këtë akt.
Postimi i plotë:
🔴 Ndërkohë që kam publikuar parimin e nismës së Aktit Normativ mbi pagesat e qerave të të dëmtuarve rëndë nga lufta që kanë humbur momentalisht aftësinë paguese dhe janë nën lloj-lloj presionesh, deri edhe të rënda nga qeradhënës të caktuar, shoh që ende pa dalë akti PD-ja është lëshuar siç di vetë kur prek majën e dëshpërimit!
🔵 Sa gjynah që janë, nuk e gjej dot pse Zoti nuk ua ushqen fare vajin e kandilit të trurit as në këtë kohë të errët, po nuk kemi ç’bëjmë!
🔴 Akti Normativ po bëhet gati, e meqë sonte kisha konfirmuar praninë në studion e 🔵PINIONIT, do të kem mundësinë t’ju shpjegoj edhe qeramarrësve më hallexhinj, edhe qeradhënësve në hallin e tyre, edhe të gjithë të tjerëve me hallet përkatëse të kohës që jetojmë, se sa i drejtë është ky Akt Normativ, me ligj e me zakon, e se sa e fajshme është në mes të luftës kjo kundërvënie e verbër e një çete vulëhumburish (pa din, pa iman e pa asnjë hall tjetër veç ëndrrës së tyre në beze), ndaj njerëzve më në hall të kësaj lufte!./abcnews.al
nev ila18:26 | 02/04/2020
Prof. Philip Caushaj një shqiptaro-amerikan dhe një nga kirurgët më të mirë në SHBA, profesor i kirurgjisë, drejtor i kërkimeve kirurgjikale në shkollën e mjekësisë në Universitetin të Connecticut në Harford të SHBA, për të cilin edhe Presidenti i republikës ka dhënë medaljen e “nderit të kombit” në një bisedë me gazetarin Endri Xhafo në ABC News, bëri të ditur situatën që është duke kaluar SHBA dhe eksperiencën personale në lidhje me pandeminë e Covid-19, por edhe mendimin e tij si një nga specialistët më të mirë të mjekësisë, për menaxhimin e situatës nga autoritetet shqiptare.
Sipas Prof. Caushaj, mënyra më e mirë për të parandaluar dhe menaxhuar sa më mirë situatën në SHBA por edhe në botë është testimi masiv i personave.
Prof. Caushaj tha se Koreja e Jugut ishte vendi që ndoqi këtë rrugë, dhe rezultoi se ka tregues shumë të mirë për menaxhimin e situatës së Koronavirusit, se sa të gjithë vendet e tjera.
Biseda e plotë:
Endri Xhafo: Pavarësisht se jeni kirurg, ju jeni marrë me koronavirusin apo jo?
Prof. Philip Caushaj: Po është e vërtetë jam i vendosur në repartin e reanimacionit ku edhe jam i specializuar në këtë fushë, aty ku pacientët kanë nevojë për kujdesin intensiv. Momentalisht jam i vendosur në këtë repart sëbashku me një grup mjekësh të tjerë.
Endri Xhafo: Ju hyni te moshat që statistikisht rrezikoheni më shumë nga koronavirusi, nuk keni frikë për veten tuaj?
Prof. Philip Caushaj: Është e vërtetë që jam i rrezikuar, por është detyra ime të jap kontributin tim dhe të punoj me studentët e mi e të shpëtojmë jetë njerëzish. Zoti e di se kur do vdes njeriu, kështuqë nuk jam i shqetësuar për këtë.
Endri Xhafo: Si paraqitet situata në spitalin e Harford?
Prof. Philip Caushaj:Shumë keq, pacientët e infektuar po rriten cdo ditë në mënyre eksponenciale, nuk kemi mjaftueshëm maska, kemi mangësi të pajisjeve mjekësore, dhe ka filluar kriza e madhe.
Endri Xhafo: Sipas informacioneve të fundit, nga mediat franceze, SHBA ka blerë cash maskat e porositura nga Franca në Kinë, përpara se të hipnin në avion. Sipas jush përse ka ndodhur kjo, si ka mundësi që SHBA u gjend e papërgatitur?
Prof. Philip Caushaj:Kjo është një tragjedi, nuk ka kuptim tashmë asnjë pasuri e Amerikës kur i gjithë ky komb u gjend kaq i papërgatitur. Sipas parashikimeve që ne bëjmë këtu, do të kemi 100 deri në 250 mijë vetë që mund të vdesin nga koronavirusi, në këto 8 javë që do të vijnë.
Endri Xhafo: Është e vërtetë që shifrat janë rritur, si paraqitet Connecticut ku ju jeni?
Prof. Philip Caushaj:Kemi një rritje të të infektuarve vazhdimisht. Në spitalin ku unë punoj janë 1000 shtretër, jemi lodhur të them të vërtetën, si mjek, infermierë dhe gjithë stafi.
Endri Xhafo: A keni frikë se mos ju ndodh situata e veriut të Italisë ku mjekët vendosin se kush do të jetojë dhe kush jo nga mungesa e kushteve dhe respiratorëve?
Prof. Philip Caushaj:Është një ëndërr e keqe për të gjithë ne doktorët, dhe nuk dua të mendoj këtë gjë. Jemi të betuar për të shpëtuar jetë dhe jo të lejojmë njerëzit të vdesin, nuk arrij ta imagjinoj dot. Mendoj që guvernatori i shtetit të New Yorkut i bëri gjërat mirë dhe në kohë. Por mos harroni se kur filloi kriza njerëzit ishin të infektuar dhe ne nuk e dinim dhe nuk dinim as krizën. Njerëzit po qarkullonin të lirë në publik, dhe infektuan në një kohë të shkurtër shumë persona.
Endri Xhafo: Trump refuzoi ta karantinojë New Yorkun, a duhet ta kishte karantinuar një qytet tjetër përvec New Yorkut?
Prof. Philip Caushaj:Ta kishte bërë do ishte mirë. Si shqiptar besoj që Trumpi mori vendime për arsye financiare dhe politike të tij, kaq mund të them.
Endri Xhafo: Javën e kaluar 6.6 milion amerikanë u regjistruan si të papunë, si mendoni se SHBA do ta përballojë ekonomikisht këtë krizë?
Prof. Philip Caushaj:Kam frikë se kombi im do bjerë në një depresion pas kësaj situate sepse është e zorshme ta rifillosh ndërtimin e ekonomisë përsëri. Ne nuk dimë akoma se sa amerikanë do të preken nga kjo sëmundje, ne kemi nevojë për testime dhe nuk po bëhen mjaftueshëm. Ne kemi nevojë për një testim masiv.
Endri Xhafo: Ky debati i testeve është debat botëror, ju filluat të ndiqni shembullin e Koresë së Jugut, ku testonit njerëzit nga makina, më pas u tërhoqët. Pse ky ndryshim?
Prof. Philip Caushaj:Nuk kishim mjaft teste, po të kishim teste mjaftueshëm, do të kishim rezultate më të mira dhe do e kishim frenuar ashtu si bëri Koreja. Po të kishim teste mjaftueshëm do të testonim cdo person dhe do izolonim të infektuarit. Ndërkohë që ja ku na ndodhi një tragjedi. Po të shohësh Korenë ajo ka tregues më të mirë se të tjerët sepse testoi shumicën e personave.
Endri Xhafo: Përse autoritetet sanitare në çdo vend të botës patën hezitim që ti paraprinin kësaj situate?
Prof. Philip Caushaj:Çdo gjë që unë mund të them është spekulim, dhe diskutimi për këtë spekulim është i kotë. Ne tani duhet të mendojmë si ta luftojmë këtë infeksion.
Endri Xhafo: Si mund të luftohet?
Prof. Philip Caushaj:Kombi amerikan deri më sot nuk ka organizuar asgjë deri tani. Duhen bashkuar të gjithë resurset dhe duhen vendosur aty ku ka nevojë populli, ka nevojë për një organizim më të madh se kaq.
Endri Xhafo: Në këto kohë krize pandemie, aksesi në kujdesin shëndetësor është i barabartë, një njeri që preket nga virusi e merr njëlloj trajtimin?
Prof. Philip Caushaj:I sëmuri që vjen në spitalin tonë me koronavirus, ne e shohim pacientin nga sëmundja dhe jo nga xhepi por kjo nuk ndodh në të gjithë spitalet amerikane fatkeqësisht.
Endri Xhafo: Në spitalin tuaj me çfarë mjekimi jeni duke i trajtuar pacientët, sepse nuk ka një protokoll?
Prof. Philip Caushaj:Kjo sëmundje fatkeqësisht ka vetëm dy rrugë për pacientët. Shumica e pacientëve e marrin dhe bëhen mirë, por ata që janë në gjendje kritike kanë nevojë për suportin ventilator, virusi dëmton indet e mushkërive ndaj ka nevojë për respiratore, ne e dimë trajtimin por fatkeqësisht nuk kemi mjaftueshëm ventilatorë për të sëmurët. Jemi si në luftë ku vijnë shumë të plagosur. Deri sot ne nuk kemi evidenca që medikamente specifike janë të efektshme 100 % mbi këtë sëmundje, ne i përdorim kur shohim që duhet të luftojmë për jetën e pacientit, por fakte se këto medikamente që përdorim janë të efektshme nuk kemi.
Endri Xhafo: Kur mendoni ju si mjek se do ishte e mundur prodhimi dhe dalja e vaksinës?
Prof. Philip Caushaj:Doktor Fauci do të marri deri në 18 muaj për nxjerrjen e vaksinës efektive. Kjo sëmundje fatkeqësisht do të vijë si puna e dallgëve, në këtë periudhë kemi dallgën më të madhe, do të ketë dallgë tjetër më të lehtë, do ketë përsëri tjetër në tetor dhe kështu që e dimë se kjo luftë nuk do mbaroj shpejt.
Endri Xhafo: E njihni situatën në Shqipëri?
Prof. Philip Caushaj: Po e di situatën, kam qenë në kontakt çdo ditë me kolegun dhe rektorin Arben Gjata, dhe me CEO-n e Spitalit Amerikan Klodjan Allajbeu, që po mundohet të bëj çmos të ndihmoj popullin shqiptar.
Endri Xhafo: Si ju duken masat e marra në Shqipëri?
Prof. Philip Caushaj:Ministrja Manastirliu dhe Rama kanë ndjekur një rrugë shumë të mirë për të frenuar këtë sëmundje. Mos harroni që Shqipëria mund të jetë vend i vogël por shqiptarët duhet të lëvizin në vende të tjera për të siguruar ekonominë e tyre dhe duke qenë kështu izolimi është tepër i efektshëm për ta.
Endri Xhafo: Si mendoni, kur do jetë fundi i kësaj pandemie?
Prof. Philip Caushaj: Fundi i pandemisë do vijë kur dallga e madhe të kalojë, të rrezikuarit më të mëdhenj të izolohen duke pritur që të dalë vaksina, vetëm atëherë do të përfundojë. Si shqiptar unë u them gjithë bashkë kombasve të mi që të kujdesen dhe të respektojnë rregullat e higjienës./abcnews.al
Sid Orela18:23 | 02/04/2020
Kryeministri Edi Rama është shprehur më herët gjatë të enjtes se se bizneset e vogla që janë mbyllur nga kriza e krijuar nga koronavirusi si familjet apo studentët që jetojnë me qira nuk do ta paguajnë këtë të fundit deri në fund të kësaj situate. Ashtu si edhe në rastin e kredive, qiraja nuk do të falet, por do të shtyhet dhe do të shlyhet pas përfundimit të gjendjes së fatkeqësisë natyrore.
Në postimin e bërë në llogarinë e tij në Facebook, Rama shkruante gjithashtu se qiradhënësi do të gjobitet sa pesëfishi i vlerës përkatëse nëse do të kërkojë pagesën e qirasë.
Gjithsesi, ky vendim i ri i marrë nga qeveria nuk ka kaluar pa reagime nga qytetarët të cilët e kanë shprehur revolën e tyre me anë të komenteve në postim.
Disa prej tyre kërkojnë të dinë se çfarë do të bëhet me qiradhënësit që varen nga qiratë që marrin, pasi të mbeten pa burimin e të ardhurave duke qenë se shteti po ndërhyn në pronën e tyre?
Rama u është përgjigjur personve që shprehën shqetësim duke u kërkuar qiradhënësve, që të ulen dhe të flasin me qiramarrësin për të gjetur një marrëveshje që detyrimin që kanë ta paguajnë me këste.
Një qytetar shkruan:
“Po qiradhënësit që varen nga qiratë që marrin apo tu kërkojnë qiramarrësve borxh, nëse ju ndërhyni në pronën time private, atëherë le të mos paguajmë as dritat dhe as tatimet deri në fund të luftës. Sështë zgjidhje kjo, hiqja njërit jepja tjeterit. Shumë qiradhënës mbeten në rrugë dhe pa pronë.”
Përgjigja e kryeministrit:
“Jo, jo ti nuk je në pikën e hallit që të marrësh borxh jo, prandaj me qeramarresin e bej nje marreveshje qe te te paguaje me keste te arsyeshme pak e nga pak detyrimin kur te mbaroje lufta”
Sid Orela17:12 | 02/04/2020
Loti i burrit më i rëndë se guri. Ndjehet i pashpresë që nuk ka asnjë mundësi t’u ofrojë kushtet më minimale dy të vogëluesheve të tij.
Skamja është ulur këmbëkryq në familjen Manoku që jeton në Orman të Korçës. Deni kërkoi ndihmë në ABC News vetëm për të siguruar pak qumësht dhe bebelina për fëmijët. Kaq modeste ishte kërkesa e tij dhe gazetarja Ledjona Xheladinaj ju gjend menjëherë dhe pa nga afër sesi një njeri dinjitoz që dikur kishte punuar në emigracion tani ka rëndë në kthetrat e mjerimit.
Deni lufton me të gjitha mënyrat që vajzat e tij dhe të Erandës të kenë dicka për të mbajtur frymën gjallë.
“Vajzat e pa qumësht e pa gjë janë. S’ka asgjë, çfarë t’i bëj. Vete torturohem ku të gjej ndonjë lugë qumësht për vajzat. Vajta i mora një shoku 20 mijë leka borxh dhe bleva një pako bebelina për fëmijët,” thotë Deni.
Nëna e dy të miturave është fjalë pak, por ajo i peshon siç peshon çdo fjalë nëne:
“Fëmijët më qajnë për bukë. Ndonjë herë i vejm dhe pa bukë në gjumë. Fasule hajm. I vejmë atje të ziejnë. Vaj s’kemi, me ujë ashtu, pa salcë pa gjë.”
Deni është vetëm 31 vjeç, ka zanat, por nuk gjen punë. Edhe kur punonte si hamall në të zezë nuk e kishte për turp, por izolim nga koronairusi i ka mbyllur çdo mundësi.
Babai i dy fëmijëve shpjegon më tej:
“Gjithmonë kam punuar. Edhe tani rashë ngushtë. Vetëm lagja që më ka ndihmuar ndonjë herë, që i ndihmoj për punë. Ngarkoj makina, ngarkoj të tëra dhe asgjë hiç.. Zanat kam po s’ka punë. Edhe nuk lejohet që të dalim në punë. Se tani siç ka ardhur kjo kriza e këtillë, kjo sëmundje, nuk dimë si t’ia bëjmë.”
Dy prindërit janë të trishtuar dhe në udhëkryq ndaj bëjnë një apel që të paktën në këto ditë të vështira dikush ju vijë sadopak në ndihmë. Jo për veten e tyre, por për vajzat.
Vajzat nuk e dinë që frigoriferi shërben për të mbajtur sa më shumë ushqime dhe teksa prindërit e saj tregojnë se ushqehen keq, 2-vjecarja instiktivisht pa e kuptuar duartroket sikur i inkurakojn për ndihmën që po kërkojnë.
“Edhe gjumi nuk më zë natën”, thotë Deni.
Abc News ishte e para që ofroi disa ndihma modeste për nevojat që ata artikuluan por mesa duket nga pamjet, kjo familje ka nevojë për shumë më shumë. /abcnews.al/
Autor E16:44 | 02/04/2020
Vijon debati botëror lidhur me përdorimin e testimeve si një nga instrumentat për të mbajtur nën kontroll pandeminë e COVID 19. Testimet janë çështje për të cilën ditët e fundit janë angazhuar drejtpërdrejt edhe vetë presidentët Trump e Makron si dhe kryeministri Johnson.
Sa testime duhet të bëjmë? Masive, personave me simptoma, të shënjestruara, apo….?
Italia është nga vendet më të prekura në botë nga COVID 19. Vlerësohet se është nga vendet me një numër të lartë testimesh të kryera. Sipas të dhënave të djeshme në Itali janë kryer 541 mijë testime apo 9 016 testime për 1 milion banorë. Nëse do të duhej që edhe Shqipëria të kishte bërë sa Italia do të duhet të kishte bërë 25 700 teste apo 14 herë më shumë.
Epidemia në Itali është prej 45 ditësh, ndërsa në Shqipëri prej 25 ditësh.
Shqipëria ka deri dje 91 pozitivë për 1 milion banorë dhe 5 3 të vdekur për 1 milion banorë.
Italia ka deri dje 1829 pozitivë për 1 milion banorë dhe 218 të vdekur për 1 milion banorë.
Por edhe në ditën e 25 (rreth 13 mars) që nga fillimi i epidemisë në Itali, në atë vend kanë qënë 291 pozitivë për 1 milion banorë dhe 21 të vdekur për 1 milion banorë.
Shqipëria e filloi kufizimin që në ditën 1 të epidemisë me mbylljen e shkollave. Italia në ditët 20-25 të saj.
Nëse dikush mund të shtrojë me të drejtë tezën se Italia ka pozitivë më shumë se ka testuar më shumë apo se testimi nuk tregon të gjithë pozitivët, të dhënat mbi vdekjen nuk mund të jenë të vlerësuara pjesshëm.
Të dhënat për vdekjet janë të sakta. Sidomos në rastin e Shqipërisë që numërohen me gishta.
Analiza më e detajuar e të dhënave italiane sipas rajoneve na jep një panoramë të larmishme.
Tabela në vijim jep të dhënat sipas rajoneve për teste për 1 milion, pozitivë për 1 milion, vdekje për 1 milion dhe raportin testime: pozitivë.
Rradhitja është sipas rajoneve më i larti te më i poshtmi rajon sipas testeve për 1 milion banorë.
Lombardia është rajoni më i prekur në Itali. Ka kryer 12 072 teste për 1 milion banorë. Më shumë se edhe Koreja e Jugut. Aty jeton 17 % e totalit të popullsisë së vendit, ndërsa janë kryer 22,4 % e të gjithë testeve të Italisë. Në Lombardi janë konstatuar 40,5 % e rasteve të Italisë dhe janë shënuar 58 % e totalit të vdekjeve në Itali.
| Teste 1M | Raste 1M | Vdekje 1M | Test/rast | |
| Veneto | 22982 | 1962 | 102 | 11.71 |
| Friuli V G | 13156 | 1387 | 100 | 9.49 |
| Emilia Romagna | 13108 | 3316 | 388 | 3.95 |
| Lombardi | 12072 | 4450 | 755 | 2.71 |
| Toscana | 9807 | 1305 | 68 | 7.51 |
| Marche | 8062 | 2598 | 296 | 3.10 |
| Liguria | 7309 | 2360 | 297 | 3.10 |
| Piemonte | 6969 | 2248 | 203 | 3.10 |
| Lazio | 6091 | 555 | 29 | 10.97 |
| Campania | 3904 | 554 | 37 | 7.05 |
| Puglia | 3775 | 483 | 32 | 7.82 |
Në përpjekje për të kuptuar ku ndryshon një rajon nga tjetri, falë informacionit të bollshëm, të përditësuar dhe lehtësisht të lundrueshëm më tërhoqën vëmendjen ndryshimet e mëdha nga rajoni në rajon të raportit midis testimeve dhe rasteve pozitive.
Tabela më poshtë është si e mësipërmja por rradhitja nga më i madhi te më i vogli është bërë sipas treguesit testime:pozitivë.
Këtu Lombardia del më dobët se çdo rajon tjetër në Itali. 2,71 testime për një pozitiv. Sikur Shqipëria të kishte bërë deri 750 testime. Në fakt Shqipëria ka bërë deri dje 2,45 herë më shumë.
| Teste 1M | Raste 1M | Vdekje 1M | Test/Rast | |
| Veneto | 22982 | 1962 | 102 | 11.71 |
| Lazio | 6091 | 555 | 29 | 10.97 |
| Friuli V G | 13156 | 1387 | 100 | 9.49 |
| Puglia | 3775 | 483 | 32 | 7.82 |
| Toscana | 9807 | 1305 | 68 | 7.51 |
| Campania | 3904 | 554 | 37 | 7.05 |
| Emilia Romagna | 13108 | 3316 | 388 | 3.95 |
| Marche | 8062 | 2598 | 296 | 3.10 |
| Piemonte | 6969 | 2248 | 203 | 3.10 |
| Liguria | 7309 | 2360 | 297 | 3.10 |
| Lombardi | 12072 | 4450 | 755 | 2.71 |
Në Itali janë bërë mesatarisht 7,8 testime për rast (deri dje ky tregues në Shqipëri është rreth 6,7).
Rajonet italiane që kanë bërë rreth 10-11 test për pozitivë (për 10 çdo teste negative del 1 test pozitiv) janë edhe ato rajone më tregues më të mirë përsa i përket rasteve dhe vdekjeve.
Mesa duket suksesi i rajonit të Venetos mund të jetë jo thjesht pse ka bërë shumë teste (22mijë teste për 1 milion banorë) por sepse për çdo pozitiv ka bërë hetim efikas për të shkuar me shënjestër sa më të saktë te kontaktet e tjerë e kështu me radhë.
A është vallë 11 teste për rast pozitiv një numur i “artë” për të administruar epideminë e COVID?
Flitet shumë për pamjaftueshmërinë e pajisjeve nëpër spitale, por mesa duket kjo është një betejë që edhe pse zhvillohet në disa fronte, fitohet më shumë në territor. /abcnews.al
ger ta16:19 | 02/04/2020
Numri i automjeteve që qarkullojnë në kryeqytet është dukshëm më i lartë se në ditët e mëparshme të izolimit. Thuajse në të gjitha zonat e Tiranës nga orët e para të mëngjesit deri në orën 13.00 kishte trafik mjetesh.
Uniformat blu të cilat qëndrojnë në rrugët kryesore të Tiranës, vazhdojnë kontrollet. Polica u kërkon drejtuesve të mjeteve, përveç autorizimit për të dalë me makinë edhe dokumentacionin e mjetit.
Në të gjitha postablloqet e ngritura, ka efektive nga policia rrugore, e rendit, edhe policia ushtarake. Blutë e kryeqytetit, ndalojnë për kontroll edhe drejtuesit e motorcikletave, duke u kërkuar lejen për të lëvizur.
Nga policia nuk kanë munguar edhe kontrollet për këmbesoret në rruge, nëse kanë marrë apo jo leje dalje.
Gjatë 24 orëve të fundit Policia e Shtetit, në të gjithë vendin ka ka ndëshkuar 10 drejtues mjetesh. Masat më të shumta janë heqje e lejes së drejtimit dhe bllokim mjeti pasi kanë shkelur urdhrin e ndalimit të qarkullimit.
Ndërsa 45 qytetarë janë ndëshkuar me gjobë prej 10 mije lekë, pasi janë konstatuar nga shërbimet e Policisë duke lëvizur në këmbë apo me biçikleta, pa qenë të pajisur me leje dalje. /abcnews.al
Autor E16:18 | 02/04/2020
Serbia, Maqedonia e Veriut dhe Bosnje-Hercegovina, kanë bërë nga 4 mijë deri në 5 mijë teste për koronavirus. Ndërsa Shqipëria me 1 823 testime në total renditet në fund të listës bashkë me Kosovën dhe Malin e Zi.
A duhet bërë testim masiv për koronavirusin apo jo?
A duhet të testohen vetëm personat me simptoma apo edhe pjesë tjetër e popullatës, që është asimptomatike? Sa i rëndësishëm është testimi në kohë të hershme për të shpëtuar jetë?
Këto pyetje vazhdojnë të debatohen ndërkohë që atyre iu shtohej edhe problemi i të pasurit apo jo të sasisë së duhur dhe të mjaftueshme të testeve në secilin vend.
Vende të ndryshme të rajonit kanë ndjekur politika të ndryshme në lidhje me testimin për kovid 19.
Greqia zë vendin e parë për nga numri i testimeve të bëra, me mbi 17 mijë, por ka në të njëjtën kohë edhe numrin më të madh të viktimave.
Kroacia, e cila ka ndjekur një politike agresive testimi duke e shtrirë më në masë sesa vendet e tjera të Ballkanit, ka bërë mbi 8 mijë teste dhe ka vetëm 6 viktima.
Serbia, Maqedonia e Veriut dhe Bosnje-Hercegovina, kanë bërë nga 4 mijë deri në 5 mijë teste për koronavirus.
Ndërsa Shqipëria me 1823 testime në total renditet në fund të listës bashkë me Kosovën që ka më shumë se 1300 testime dhe Malin e Zi me më shumë se një mijë testime.
Në këto kalkulime, duhet patur parasysh edhe numri i popullsisë në vendet përkatëse dhe krahasimet bëhen midis vendeve që kanë afërsisht popullsi të njëjtë.
Por në ndryshim nga Shqipëria, Kroacia dhe Maqedonia e Veriut po ndjekin një politikë agresive ndaj virusit, duke e shtrirë testimin në masë të gjerë. Kroacia duke futur edhe testimin nga makina dhe Maqedonia e Veriut përmes hapjes së më shumë se 14 pikave të testimit.
Testimi nga makina i quajtur “drive in”, është shpjeguar sot për publikun kroat përmes mediave.
Doktoresha Jasmina Vranes shefe e Mikrobiologjisë Klinike, ka shpjeguar saktësisht sesi funksionon kjo metodë dhe pse vendosën ta zbatojnë atë. Dr Vranes theksoi se ata po përdorin një test që zbulon të tre gjenet e koronavirusit dhe se testi është plotësisht i sigurt.
“Mjeku i mjekësisë familjare ose epidemiologu referojnë pacientin.
Ne kemi lista të krijuara. Në mbrëmje marrim listat e atyre personave që, sipas indikacioneve të mjekëve të përgjithshëm të familjes, ose mjekëve të epidemiologjisë, na janë referuar në sistemin” drive in “.”
Doktoresha shpjegoi se personi vjen me makinë dhe i merret kampioni për analizë ndërkohë që ai nuk del nga makina.
“Kur bëhet fjalë për kontejnerë, në ato raste, ne nuk mund ta shkurtojmë kohën e dekontaminimit, e cila është gjashtë ose shtatë minuta pasi pacienti është larguar. Dhe këtu nuk ka asnjë ndotje, sepse ne jemi jashtë, pacienti është në makinë”.
Ajo gjithashtu theksoi se nuk ka asnjë kontakt midis personave që testohen dhe profesionistëve të kujdesit shëndetësor, sepse gjithçka kalon në sistemin e e-referimit dhe personi që po testohet është në një listë të përgatitur paraprakisht. /abcnews.al
Autor E15:03 | 02/04/2020
ISHP ka konfirmuar 18 raste të reja me koronavirus në vend duke e çuar numrin total të të prekurve në 277 që prej fillimit të krizës më datë 9 mars.
Zona më e prekur gjatë 24 orëvë të fundit duket të jetë Hasi me 6 raste të reja, ndrësa ndiqet nga Tirana dhe Elbasani me nga 3 raste të reja secili qytet.
Në total, Tirana arrin në 143 raste, Durrësi në 30 raste, Fieri në 23 raste, Shkodra me 10 raste dhe Hasi me 8 raste.
Rastet e reja gjatë 24 orëvë të fundit
-3 raste Tiranë
-1 raste Durrës
-6 raste Has
-1 rast Kavajë
-2 raste Shkodër
-3 raste Elbasan
-1 rast Lezhë
-1 rast Pukë
Raste total sipas rretheve
– Tiranë 143 raste
– Durrës 30 raste
– Lushnje 4 raste
– Elbasan 8 raste
– Fier 23 raste
– Kavajë 6 raste
– Rrogozhinë 2 raste
– Korçë 16 raste
– Vlorë 5 raste
– Shkodër 10 raste
– Lezhë 6 raste
– Berat 1 rast
– Has 8 raste
– Krujë 5 raste
-Tropojë 4 raste
– Pukë 4 raste
– Mirditë 2 raste.
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
20:24 | 02/04/2020
