Loading ...
Presidentja e re e Kosovës, Justina Shiroka-Pula, ka marrë zyrtarisht detyrën në një ceremoni solemne inauguruese. Ceremonia shënon nisjen e mandatit të saj në krye të institucioneve të vendit.
Justina Shiroka Pula u zgjodh presidente e Kosovës, në minutat e para të 7 tetorit, pas një marrëveshjeje të minutës së fundit mes Lëvizjes Vetëvendosje në pushtet dhe Partisë Demokratike të Kosovës në opozitë.
Votimi i fshehtë nisi vetëm gjashtë minuta para mesnatës së 6 tetorit, kur skadonte afati kushtetues për zgjedhjen e presidentit, por përfundoi pas këtij afati. Deputetët synonin të shmangnin shpërndarjen automatike të Kuvendit dhe zgjedhjet e tjera të parakohshme.
Ajo u zgjodh që në rundin e parë të votimit, me 81 vota pro.
Shiroka Pula, 72 vjeçe, u betua si presidente para deputetëve të Kuvendit të Kosovës dhe tha se e pranon “me përgjegjësi” detyrën e re.
“Ky mandat nuk i përket vetëm një personi, por qytetarëve dhe shtetit”, tha ajo në fjalimin e saj para deputetëve.
Ajo u zotua se do të jetë presidente e të gjithë qytetarëve dhe se do ta mbrojë Kushtetutën, interesin e republikës dhe interesat e qytetarëve të Kosovës.
