Kategoria e Parë rikthehet në fushë sot, kur janë planifikuar të luhen 5 ndeshje. Në Grupin A Vora sfidon si pritëse Dinamo, që ndodhet në vendin e dytë, por ka mundësinë sot të parakalojë Burrelin në krye. Ndeshja tjetër e grupit A është ajo mes Veleçikut dhe Orikut në stadiumin “Reshit Rusi”.
Në grupin B Pogradeci ka detyrën e lehtë të fitojë ndaj Elbasanit, që ende nuk ka provuar as shijen e barazimit dhe renditet e fundit me asnjë pikë.
Ndërkohë Tomori i vendit të tretë sfidon Flamurtarin, që çdo ditë e më shumë i dalin probleme të reja jashtë fushe. Ndeshja tjetër është ajo mes Egnatias dhe Turbinës, që mund të themi se është supersfida e sotme. Egnatia është në vendin e parë, ndërsa cërrikasit renditen në vendin e 6.
Sot luhet edhe në të Dytën, në grupin A. Vendi i dytë në renditje, Sopoti sfidon Valbonën, që synon qëndrimin në Kategorinë e Dytë. Sfida e fundit është ajo mes Gramshit të vendit të gjashtë dhe Mirditës së vendit të fundit. Ndeshjet luhen të gjitha në orën 13:30. /abcnews.al
