Qeveria greke e ka shpallur Janinën “zonë të kuqe” dhe aty masat anti-covid tashme pritet të jenë më të rrepta. Por, sipas asaj që raportojnë mediat greke duke cituar guvernatorin e Epirit Alekos Kachrimanis, të gjithë pacientët që ndodhen në njësitë e kujdesit intensiv në spitalet e Janinës janë nga Shqipëria.
Kachrimanis raportohet të jetë shprehur se numri i madh i shqiptarëve të shtruar në spitale ka kontribuuar në futjen e Janinës në zonën e kuqe.
“Pamja epidemiologjike e Janinës ndikohet ndjeshëm nga pacientët që janë pranuar nga Shqipëria dhe po trajtohen në spitalet e rajonit,” është shprehur ai.
Guvernatori Rajonal i Epirit në deklaratën e tij me shkrim është shprehur se Njësia Rajonale e Janinës kishte arritur të kontrollonte përhapjen e koronavirusit, “falë kontrolleve të strukturuara, sistematike në komunitet, institucioneve, spitaleve, vendeve publike dhe shumë bizneseve.”
Në deklaratën e tij, Kachrimanis thekson qartë se situata epidemiologjike e rajonit ndikohet nga transferimet e bëra nga Shqipëria.
“Sidoqoftë, barra epidemiologjike në zhvillim e Janinës javët e fundit është kryesisht për shkak të faktorëve të jashtëm dhe veçanërisht për transferimet totale dhe pranimet në spitale të pacientëve nga Shqipëria fqinje, të cilat vendosen dhe miratohen nga Ministria e Punëve të Jashtme. Sot 50% e pacientëve të trajtuar në Njësitë e Sëmundjeve Infektive të spitaleve të Janinës vijnë nga Shqipëria, nga vijnë të gjithë pacientët e trajtuar në Njësitë e Kujdesit Intensiv ”.
Mediat greke shpjegojnë gjithashtu, atë që e cilësojnë hilen e shqiptarëve për t’u kuruar ndaj Covid-19 në Greqi.
“Shofer ndal, kam dhimbje në zemër dhe nuk ndihem mirë”. Me këtë frazë, dhjetëra shtetas shqiptarë që janë diagnostikuar në vendin e tyre pozitiv për koronavirus, kalojnë kufirin me një test të rremë negativ dhe arrijnë të kurohen në Spitalin Universitar të Janinës,” shkruajnë mediat greke.
Më tej shpjegohet se pasi arrijnë kufirin, ata i thonë shoferit se nuk po ndihen mirë dhe presin që të dërgohen në spital, ku rrjedhimisht do të testohen edhe për Covid-19.
“Sapo kalojnë kufirin, ata i thonë shoferit të autobusit se nuk po ndihen mirë dhe se po përjetojnë dhimbje në zemër, me rezultat që shoferi t’i çojë drejtpërdrejt në Qendrën Shëndetësore Delvinaki (një fshat afër kufirit me Shqipërinë) ) Aty ata i nënshtrohen një testi të shpejtë i cili është natyrshëm pozitiv “.
I pyetur se pse shqiptarët po mundohen që të kurohen në Greqi dhe jo në vendin e tyre, zyrtari grek Dimitriou, citohet të ketë thënë: ” Për arsyen e thjeshtë se në vendin e tyre politika e qeverisë ndaj pandemisë, është praktikisht jo- ekzistuese. Gjithçka është e hapur, pa kontroll dhe në rast se përjetoni simptoma të rënda, gjithçka që ato ofrojnë është një aparat për frymëmarrje dhe mbyllje në shtëpi, kështu që ka kuptim që ata të kërkojnë trajtim në spitalet greke.” sb/abcnews.al/
