Loading ...
Mori fund arratia e një 29-vjeçari shqiptar në Itali, i cili të hënën në mesnatë qëlloi me pistoletë xhaxhain e gruas së tij.
Endrit Memaj arriti t’u largohej autoriteteve për 64 orë, ndërsa mediat italiane shkruajnë se ai u vetëdorëzua në polici të enjten e 19 Korrikut pasi u konsultua me avokatin e tij.
Memaj nuk arriti të ikte jashtë Italisë, i mbaruan paratë dhe të gjitha kontaktet e tij ishin nën vëzhgimin e policisë. Kjo e detyroi 29-vjeçarin shqiptar të dorëzohej sipas mediave.
Gjithçka ndodhi mesnatën e së hënës shkruajnë mediat, në shtëpinë e tij në Brugheria. Të pranishëm në momentin e ngjarjes ishte gruaja e shqiptarit, e cila është moldave, xhaxhai i saj dhe gruaja e këtij të fundit.
Midis Memajt dhe bashkëshortes së tij kishte nisur një debat dhe xhaxhai kishte tentuar të ndërhynte.
Në këto momente, Memaj, i cili nga fqinjët është përshkruar si një person që zemërohej shpejt, nxorri armën dhe qëlloi në bark 36-vjeçarin moldav. Menjëherë pas kësaj ai hipi në makinën Alfa Romeo, që është në pronësinë e vëllait të tij dhe u largua nga vendi i ngjarjes.
Policia ka njoftuar se deri më tani nuk kanë arritur ta zbulojnë se ku është arma e krimit, të cilën shqiptari e mbante në mënyrë të paligjshme.
Ndërkohë 39-vjeçari i plagosur është i shtruar në spital dhe po merr ndihmën e nevojshme mjekësore.
Mbi shqiptarin rëndon akuza vrasjes së mbetur në tentativë. Gjithashtu 29-vjeçari Memaj ka precedentë të mëparshëm penalë për shpërndarje të lëndëve narkotike./abcnews.al
