Loading ...
Poetja, eseistja dhe përkthyesja kanadeze Anne Carson është shpallur fituese e Çmimit Nobel për Letërsinë për vitin 2026. Akademia Suedeze e ka vlerësuar për kontributin e saj të veçantë në letërsinë bashkëkohore dhe për mënyrën novatore me të cilën ka ndërthurur traditën klasike me forma të reja të shkrimit.
Në moshën 76-vjeçare, Carson është një prej zërave më të veçantë të letërsisë moderne. Krijimtaria e saj lëviz mes poezisë, fiksionit, esesë dhe studimit akademik, duke sfiduar shpesh ndarjet tradicionale mes këtyre gjinive.
Sipas Komitetit Nobel, çmimi iu dha Carson për “veprën e saj të guximshme dhe novatore”, e cila, përmes një marrëdhënieje krijuese me letërsinë klasike, ka sjellë forma të reja në shkrimin bashkëkohor.
Nobeli për Letërsinë konsiderohet një nga vlerësimet më të rëndësishme ndërkombëtare për një autor dhe i jepet një shkrimtari në vlerësim të veprës së tij të përgjithshme. Këtë vit, çmimi shoqërohet me një shpërblim prej 12 milionë koronash suedeze, rreth 1.2 milionë dollarë.
Përveç krijimtarisë së saj, Carson ka spikatur edhe si përkthyese e veprave të letërsisë së lashtë greke. Ajo ka pasur gjithashtu një karrierë të gjatë akademike, duke dhënë mësim për më shumë se tri dekada në fushën e klasikëve.
Me këtë çmim, Anne Carson i bashkohet emrave më të shquar të letërsisë botërore të nderuar nga Akademia Suedeze. Vepra e saj, e karakterizuar nga kombinimi i poezisë, trashëgimisë klasike dhe eksperimentimit letrar, e ka bërë një figurë të rëndësishme dhe të veçantë të letërsisë së kohës sonë.
