Loading ...
Të paktën gjashtë persona kanë humbur jetën dhe pesë të tjerë janë plagosur në prefekturën Çiba, në lindje të Japonisë, pranë Tokios, pas reshjeve rekord që kanë goditur rajonin. Autoritetet japoneze e kanë cilësuar situatën si “të paprecedentë”, ndërsa reshjet intensive kanë shkaktuar përmbytje, rrëshqitje dherash dhe ndërprerje të energjisë elektrike. Më shumë se 20 mijë familje kanë mbetur pa energji, ndërsa rreth 7 mijë udhëtarë u detyruan të kalonin natën në aeroportin Narita të Tokios.
Të enjten, autoritetet lokale aktivizuan nivelin e pestë të alarmit, shkallën më të lartë të paralajmërimit për fatkeqësi natyrore në Japoni. Të premten në mëngjes, alarmi u ul në nivelin e katërt, por autoritetet vijojnë të paralajmërojnë për rrezikun e përmbytjeve dhe rrëshqitjeve të dheut. Prefektura Çiba ka regjistruar që nga pasditja e së enjtes më shumë se 100 milimetra shi në orë.
Agjencia Meteorologjike e Japonisë shpjegoi se reshjet e dendura janë shkaktuar nga depërtimi i ajrit të ngrohtë dhe të lagësht në lindje të vendit, i cili është përplasur me masa ajri të ftohtë në lartësi, duke krijuar kushte atmosferike jashtëzakonisht të paqëndrueshme.
Mes viktimave është një grua që humbi jetën brenda automjetit të saj, i cili u përmbyt në një rrugë të mbuluar nga uji. Dy persona të tjerë u rrëzuan në rrugë dhe më vonë humbën jetën. Më shumë se 100 mijë familje u urdhëruan ose u këshilluan të evakuoheshin të enjten, pasi reshjet shkaktuan rrëshqitje dherash dhe ndërprerje të energjisë. Disa shërbime hekurudhore vijojnë të jenë të pezulluara, ndërsa disa nga autostradat kryesore janë mbyllur.
Në stacione të transportit publik pati udhëtarë të bllokuar, ndërsa rreth 1,800 persona kaluan natën në ndërtesën e administratës së prefekturës Çiba.
Reshjet e fuqishme në Japoni vijnë pas një serie stuhish që kanë përshkuar Japoninë dhe vendet fqinje gjatë kësaj jave, në një sezon tajfunesh që pritet të jetë jashtëzakonisht aktiv.
