Luis Suarez: Meritoja pak respekt, ju tregoj pse më zhgënjeu Barcelona

schedule09:28 - 23 Shkurt, 2021

schedule 09:28 - 23 Shkurt, 2021

Luis Suarez është një nga sulmuesit më të mirë në qarkullimin dhe këtë e thonë shifrat. 16 gola në 20 ndeshje me fanellën e Atletico Madrid tregojnë edhe njëherë gabimin që bëri Barcelona në verë, kur vendosi t’ia bëjë dhuratë rivalëve në La Liga. Uruguaiani është rikthyer të flasë për largimin nga katalanasit dhe keqardhja e vetme e tij është për mënyrën se si u largua.

“Ajo që më shqetësoi dhe më bëri të ndjehem keq ishte kur më thanë se isha i moshuar dhe nuk mund të luaja më në një nivel të lartë, të përballesha kundër ekipeve të forta. Kjo është ajo që nuk më pëlqeu.  Nëse nuk do të kisha bërë asgjë për një klub si Barcelona për 3-4 sezone, unë do e kisha kuptuar vetë.

 

Por unë po shënoja çdo vit mbi 20 gola me ata. Gjithmonë kisha statistika të tikë, direkt pas Leo Messit”, është shprehur fillimisht Suarez, në një intervistë të dhënë për “France Football”.Sulmuesi nuk ndalet me kaq:

“Tani mund ta shohim të gjithë se nuk është e lehtë të luash me Barcelonën. Shumë lojtarë që kanë firmosur nuk kanë nivelin që ata prisnin prej tyre. Unë luajta për gjashtë vite duke ruajtur një nivel dhe duke qenë në lartësinë e pritshmërive.

Gjërat kanë ndryshuar atje, klubi kishte nevojë për ndryshime. Unë e pranova ndryshimin. E vetmja gjë që më mërziti ishte mënyra se si ndodhi. Mendoj se e kam merituar një farë respekti. Ishte një vendim që nuk e parandaloja dot.

Ndjeva sikur nuk po më llogarisnin më, kështu që me krenarinë time i thashë vetes se do të vazhdoja të tregoja se sa vlej. Kjo ishte arsyeja pse më pëlqeu ideja të shkojë në një ekip konkurrues si Atletico Madrid”. /abcnews.al