Loading ...
Hamas po shqyrton krijimin e një udhëheqjeje kolektive për të drejtuar krahun e saj të armatosur, në një model të ngjashëm me komitetin e formuar nga drejtuesit e organizatës në mërgim. Sipas raportimeve, kjo do të ishte një zgjidhje emergjente, ndoshta e përkohshme, për të garantuar vazhdimësinë e komandës së Brigadave Al-Qassam pas humbjes së një sërë drejtuesish të lartë.
Plani thuhet se është hartuar pas vrasjes, brenda pak javësh, të komandantit kryesor Ezzedine al Haddad, pasuesit të tij Mohammed Odeh dhe zëvendësit Imad Aslim, të gjithë të vrarë në sulme të synuara izraelite.
Sipas burimeve të cituara nga gazeta arabe Asharq Al-Awsat, nuk është ende e qartë nëse bëhet fjalë për një ide që po diskutohet apo për një vendim që tashmë është marrë. Megjithatë, Hamas ka nevojë të ruajë funksionimin e strukturës së saj ushtarake dhe kontrollin mbi zonat që ende administron në Rripin e Gazës, çka kërkon një zinxhir komandues fleksibël, të mbrojtur dhe funksional.
Paralelisht, aparati i sigurisë së brendshme i Hamasit po përpiqet të identifikojë personat që dyshohet se kanë ndihmuar Izraelin në realizimin e eliminimeve të njëpasnjëshme të drejtuesve të organizatës.
Situata është bërë edhe më e vështirë pas vrasjes së tre zyrtarëve të ngarkuar me mbrojtjen e komandantëve të lartë. Kjo konsiderohet si një tregues i nivelit të infiltrimit që ka pësuar lëvizja, e cila vazhdon të ruajë kontrollin në disa zona, por me hapësira gjithnjë e më të kufizuara për shkak të presionit ushtarak të ushtrisë izraelite (IDF), shërbimit të sigurisë Shin Bet dhe grupeve lokale që, sipas raportimeve, mbështeten nga Izraeli.
Pas çdo eliminimi të një drejtuesi të Hamasit, mediat izraelite përpiqen të rindërtojnë hartën e figurave që kanë mbetur në strukturën drejtuese. Emra të rinj dalin vazhdimisht në qarkullim, ndërsa shumë prej tyre kanë marrë pozicione kyçe për shkak të vrasjes së paraardhësve të tyre. Megjithatë, informacionet shoqërohen me kujdes, pasi statusi i disa figurave mbetet i paqartë dhe lufta e informacionit mes palëve vazhdon.
Mes emrave që përmenden si kandidatë të mundshëm për të marrë drejtimin e krahut ushtarak është Imad Akel, një veteran i Brigadave Al-Qassam që ka mbajtur poste të rëndësishme në Gaza dhe më pas është marrë me programet e armatimit. Sipas raportimeve, Izraeli ka tentuar ta eliminojë të paktën dy herë, por ai ka mbijetuar, duke mbetur i plagosur në një prej rasteve.
Një tjetër figurë e përmendur është Muhannad Rajab, i konsideruar si strateg me përvojë dhe që së fundmi ka arritur t’i shpëtojë operacioneve izraelite. Gjithashtu në listën e emrave potencialë për drejtimin e organizatës janë edhe Ezzedine al Beik, përgjegjës për sektorin verior, dhe Mohammed al Bureim, i cili drejton militantët në Khan Younis.
Burimet e Asharq Al-Awsat theksojnë se secili prej tyre mund të emërohet në krye të strukturës ushtarake, ndonëse jo domosdoshmërisht menjëherë.
Më herët, pas një serie operacionesh izraelite në qytete si Bejruti, Teherani dhe Doha kundër drejtuesve të Hamasit në mërgim, organizata kishte krijuar një këshill drejtues kolektiv, duke mbajtur të fshehtë identitetin e personave që udhëhiqnin luftëtarët në Gaza. Megjithatë, kjo strategji nuk ka arritur të pengojë sulmet e mëtejshme të synuara nga Izraeli.
