Britania kërkoi që Bashkimi Europian të lejojë shpërndarjen e vaksinave COVID-19 që ka porositur ndërsa janë rritur tensionet mbi një ndalim të mundshëm të eksportit nga BE.
Ndërkohë Brukseli ka fajësuar AstraZeneca.
“Mbretëria e Bashkuar nuk ka faj. BE nuk ka faj, ”tha një zyrtar i BE-së. “AstraZeneca duhet të shpërndajë doza për klientët e saj të BE-së. ”
Kryeministri britanik Boris Johnson foli me disa udhëheqës më të fuqishëm të BE-së, Kancelaren Angela Merkel dhe Presidentin Francez Emmanuel Macron, duke i kërkuar të hiqnin dorë nga ndalimi i eksporteve.
Zëdhënësi i Johnson nuk pranoi të komentonte nëse Britania, e cila doli nga orbita e BE-së në 31 dhjetor, po konsideronte masa në shenjë hakmarrje.
AstraZeneca i ka thënë Brukselit se Britania e Madhe po përdor një klauzolë në kontratën e saj të furnizimit që parandalon eksportet e vaksinave derisa të furnizohet i gjithë tregu britanik, thanë zyrtarët e BE-së.
Komisioni Europian, tha se pika kryesore ishte reciprociteti. KE ka eksportuar rreth 35 milion doza që nga fundi i janarit, duke përfshirë 10 milion në Britani, por Britania nuk ka eksportuar asnjë.
Ndërsa Franca, Gjermania dhe Italia mbështesin gjerësisht masat më të rrepta të eksportit, vendet përfshirë Holandën, Belgjikën dhe Irlandën janë më të kujdesshme në lidhje me ndërprerjen e marrëveshjeve me Mbretërinë e Bashkuar.
Kryeministri Irlandez Michael Martin tha se çdo kufizim i BE-së mbi eksportet e vaksinave do të ishte një “hap prapa”. BE deri më tani ka bllokuar një dërgesë vaksinash në Australi.
Një zyrtar i BE-së tha për Reuters se blloku po kundërshtonte thirrjet e qeverisë britanike për të dërguar vaksinat AstraZeneca të prodhuara në një fabrikë në Holandë, megjithëse kompania nuk ka bërë një kërkesë zyrtare për eksport.
“Britanikët po insistojnë që fabrika Halix në Holandë t’u dërgojë atyre sasinë e vaksinave që janë prodhuar atje. Kjo nuk funksionon në këtë lloj mënyrë, ”tha zyrtari për Reuters.
Fabrika me bazë në Leiden, është kompania furnizuese e vaksinave në të dy kontratat që AstraZeneca ka nënshkruar me Britaninë dhe me Bashkimin Europian. AstraZeneca nuk ka kërkuar ende miratim për vaksinat e prodhuara në Halix për t’u shpërndarë në BE, por zyrtarët e BE-së thanë se kërkesa ishte në rrugën e duhur.
Që nga 20 Mars, Britania ka administruar gati 44 vaksina për çdo 100 njerëz, ndërsa BE ka administruar gati 13 doza në 100 persona. /abcnews.al
