Drejtuesi Politik i Partisë Demokratike për qarkun e Elbasanit, Gazment Bardhi ka zhvilluar ditën e sotme takime me banorët e fshatit Bazlëz dhe Rrole.
Gjatë bashkëbisedimit Bardhi tha se PD pas 25 prillit do të rishikojë ndarjen territoriale, do të bëjë korrigjimet e duhura, pasi janë shumë ish-komuna dhe shumë fshatra që nuk marrin asnjë shërbim.
Ndërsa ndarja administrative, sipas Bardhit, ishte një dështim.
“Ne do ta zhbëjmë Reformën Territoriale, nuk ka nevojë për 450 njësi administrative, por për 120 deri në 150 njësi administrative ka nevojë Shqipëria. Do të tentojmë ta bëjmë me ligj dhe na duhen 84 mandate”, tha ai.
Më tej Bardhi u shpreh se programi i PD parashikon subvencionim për bujqësinë dhe blegtorinë, sipas dynymëve dhe krerëve të bagëtive, dhe vetëm me kartën e identitetit, duke hequr burokracitë e pengesat që ka vënë qeveria.
“Përqendrimi ynë është të nxjerrim fshatin nga mjerimi, sepse po nxorëm fshatin nga mjerimi kemi nxjerrë 50% të popullsisë. Braktisja ka ardhur prej dy faktorësh, e para, i konsiderojnë njerëzit si dele, i varfërojnë me idenë që të vijnë t’i blejnë ditën e votimit.
Prandaj e kanë braktisur fshatin dhe Elbasanin për tetë vite dhe e dyta bënë Reformën Territoriale me idenë që do kishin më shumë mundësi për investime, ju vunë disa taksa shtesë, ju mbytën me gjoba.
Ju rrisin taksat dhe i çojnë tek Bashkia e Elbasanit që ai të ndërrojë pllakat. Rama tha se ka shpërndarë 95 milionë euro vitin që shkoi. I ka marrë Bullai, i ka marrë Gjergj Luca dhe i kanë marrë shokët e Taulant Ballës”, tha më tej Bardhi.
/abcnews.al/
