Loading ...
Futbolli nuk është vetëm sport, por edhe mënyrë për të ndihmuar njerëzit. Një gjë të tillë e bën klubi Juban Danja në Shkodër, që ka integruar në shoqëri me dhjetëra fëmijë të komunitetit rom dhe egjiptian.
Dëshirat e tyre janë të bëhen yje si Mesi e Ronaldo, pse jo si Hysaj apo Sadiku.
Asnjëherë nuk mungojnë në stërvitje, pra kaq shumë e duan futbollin.
“Juban Danja” nuk është më vetëm ekip futbolli për vajza, por edhe për djem, ndërsa pjesë e këtij ekipi janë fëmijë të komunitetit rom dhe egjiptian të Shkodrës.
Pjesa më e madhe, fëmijë të rrugës.
Gjithçka nisi si një ide spontane me qëllim integrimin e tyre në shoqëri, e sot janë pjesë e Ligës amatore të rajonit të veriut.
Përtej pritshmërive, këta fëmijë kanë shfaqur talent të madh, por më rëndësishmja është frekuentimi i shkollës.
Petrit Prroni, drejtori i Shkollës ” Liria”, ku këta fëmijë janë nxënës, shprehet se përmes futbollit është arritur edhe më shumë socializimi i tyre.
Përfaqësues të këtij komuniteti krahas falenderimeve, kanë edhe një kërkesë për Bashkinë e Shkodrës, pikërisht ndërtimin e një terreni sportive.
Pjesa më të madhe e stërvitjeve kryhen në terrene private, ndonëse u janë ofruar pa pagesë, e pjesa tjetër është mbështetur nga Klubi “Juban Danja”.
Në total, janë 45 fëmijë të moshës nga 9 deri në 16 vjeç, që njëkohësisht stërviten për të qenë futbollistë, por edhe i shmangen rrugës e shkollohen./abcnews.al
Gazetar: Simon Shkreli
