Në ditën e dytë të vizitës në Itali, kreu i Bashkisë së Tiranës, Erion Veliaj ishte i ftuar në forumin e arkitekturës dhe urbanizmit në Milano ku morën pjesë arkitektë, urbanistë dhe ekspertë të mjedisit nga disa vende të botës. Kryebashkiaku Veliaj prezantoi ndryshimet që ka pësuar Tirana tre vitet e fundit.
Pavarësisht mundësive financiare kryeqyteti i Shqipërisë po cilësohet sot si një nga qytetet që duhet marrë shembull për nismat e gjelbërimit. Kështu e prezantoi Tiranën, kryetari i Bashkisë, Erion Veliaj, në Milano.
“Ishte një mundësi fantastike për të treguar historinë e suksesit të Tiranës. Më vjen mirë që sa herë flitet për qytetet e gjelbra dhe cili është qyteti që ka arritur të gjelbërohet, duke mobilizuar qytetarët në mbjelljen e pemëve dhe hapësirat e gjelbra, Tirana është emri i parë që përmendet. Ishte një mundësi e mirë për të treguar se si edhe në qytetet si Tirana, me mundësi modeste dhe buxhete të vogla, mobilizimi i njerëzve të thjeshtë, disa herë i fëmijëve, të moshuarve, i familjarëve, i atyre që ndoshta s’kanë mundësi financiare, por që duan të lënë një shenjë në qytet, qoftë duke mbjellë një rrënjë peme, ka bërë ndryshimin në Tiranë”.
Në forumin e arkitekturës dhe urbanizimit, kryebashkiaku Veliaj theksoi se suksesi i arritur me mbjelljen mbi 120 mijë pemëve do të vazhdojë, për t’u kthyer në një aksion të përvitshëm, deri në krijimin e Pyllit Orbital.
Ai tha se takime të tilla ndërkombëtare apo ekspozita si ajo e Bienales së Venecias janë mundësia më e mirë për të shfaqur tek të huajt potencialin turistik që ofron sot Tirana, si një qytet që ndryshon me shpejtësi, por edhe që mbart në vetvete histori dhe kulturë të pasur, për të cilat ia vlen ta vizitosh.
“Promovimi që po i vjen Tiranës prej Bashkisë, Bienales apo konferencave të tilla, ku vijnë shumë prej agjentëve turistikë dhe shumë prej atyre që mbulojnë mediatikisht vendet e huaja, besoj se i shërben vendit. Teksa afron vera, një nga gjërat më të mira që mund t’i bëjmë Shqipërisë është të tregojmë historinë tonë. Ndoshta, mund të mos jemi vendi me më shumë luks, por kemi shumë jetë, gjallëri, më shumë art, kulturë; elementë që kërkojnë turistët sot”.
Kreu i Bashkisë së Tiranës tha se kryeqyteti për shkak të historisë, kulturës, natyrës dhe ndryshimit që pëson çdo ditë, është një shtysë më shumë për turistët që vizitojnë Shqipërinë.
“Nëse Tirana është “grepi” që i tërheq turistët për të ardhur në Shqipëri dhe më pas kalojnë pak kohë në bregdet, në Berat, Gjirokastër, besoj se ia vlen fushata promovimit. Me ndërhyrjet që po bën qeveria në zonat turistike për t’i pastruar, promovuar, plus edhe fuqia e Bashkisë së Tiranës në të gjitha këto forume, them se janë agjenti më i mirë i marketingut për atë që është skuadra jonë, skuadra e Shqipërisë”./abcnews.al
