Loading ...
Të paktën tre persona humbën jetën në një anije turistike në Oqeanin Atlantik si pasojë e një virusi, ndërsa tre pasagjerë të tjerë janë të sëmurë.
Organizata Botërore e Shëndetësisë dhe Departamenti i Shëndetësisë i Afrikës së Jugut thanë se shkak ishte një hantavirus, që zakonisht vjen prej brejtësve.
Një nga pacientët ishte në kujdes intensiv në një spital të Afrikës së Jugut dhe dy të tjerë janë në anije.
Kompania holandeze që zotëron anijen turistike tha se anija tani ndodhej pranë brigjeve të Kepit të Gjelbër, një komb ishullor pranë bregut perëndimor të Afrikës, dhe autoritetet lokale po ndihmojnë, por nuk kishin lejuar askënd të zbresë.
Anija turistike u nis nga Argjentina rreth tre javë më parë me rreth 150 pasagjerë dhe u ndal në Antarktidë dhe vende të tjera gjatë rrugës.
Hantaviruset, të cilat gjenden në të gjithë botën, janë një familje virusesh që përhapen kryesisht nga kontakti me urinën ose jashtëqitjet e brejtësve të infektuar si minjtë.
Hantaviruset shkaktojnë dy sindroma serioze: sindroma pulmonare e hantavirusit, një sëmundje e rëndë që prek mushkëritë, dhe ethet hemorragjike me sindromën renale, një sëmundje e rëndë që prek veshkat.
Edhe pse rrallë, infeksionet me hantavirus mund të përhapen midis njerëzve. Nuk ka trajtim ose kurë specifike, por trajtimi i hershëm mjekësor mund të rrisë shanset e mbijetesës.
