Fundjava që sapo lamë pas dhuroi spektakël e rekorde në Kampionatin anglez të futbollit, Premier League, mirëpo përveç këtyre u pa gjithashtu dhe një ndryshim renditjesh në tabelë, me “qytetarët” e Manchester City që u ngjitën në majë pas triumfit minimal 1 me 2 në fushën e Fulham.
Me një shkëputje prej 1 pike dhe me një ndeshje mangët “topçinjve”, djemtë e Pep Guardiolas kanë mundësinë e artë këtë sezon për t’i rrëmbyer trofeun e shumë dëshiruar djemve të Arsenal, mirëpo për një teknik të Premier League duket se lufta për titull nuk ka përfunduar ende.
Në një konferencë për shtyp në prag të ndeshjes së nesërme ndaj Arsenal, tekniku i Chelsea, Frank Lampard është shprehur Arsenal ka ende shanse për të fituar titullin e Premier League, ku gjithashtu i ka konsideruar lojtarët e “topçinjve”, si lojtarë me ambicie dhe “të etur” për fitore.
“Ata janë ende shumë të etur për të fituar Premier League. Ata janë një ekip fantastik dhe po bëjnë një sezon të mrekullueshëm. Nëse lëndohen lehtë, mund të reagojnë fuqishëm.
Sigurisht që kanë mbetur edhe shumë ndeshje që “elementi” i rrezikut të jetë ende i pranishëm në krye të tabelës dhe në fund. Ata patjetër qëndrojnë në garë. Manchester City ka treguar formë të jashtëzakonshme dhe ne kemi shumë respekt për këtë, por duhet të respektojmë edhe atë që Arsenali ka bërë këtë vit. Ata ende do të besojnë se janë në luftë dhe me të drejtë”,- tha gjatë konferencës tekniku i “bluve”. /i.m /abcnews.al
