TIRANË- Policia thotë se ka marrë masat për të garantuar jetën e 28-vjeçares së dhunuar dhe të familjarëve të saj.
Ky reagim vjen pas thirrjes së avokatit, i cili kërkoi nga instancat shtetërore t’i garantojnë siguri për jetën klientes së tij. E reja u mbajt e mbyllur dhe u dhunua fizikisht nga bashkëjetuesi i saj, Gleard Gusholli.
Ajo tregon se është njohur me Gushollin rreth një vit e gjysëm më parë dhe ky gjest i tij sipas saj u bë për hakmarrje.
Për disa kohë ata kanë jetuar të së bashku në familjen e saj në Gjermani, aty ku filloi edhe dhuna. Prindërit e 28-vjeçares kuptuan që ai ushtronte dhunë ndaj vajzës së tyre dhe e larguan nga shtëpia.
Njoftimi i policisë:
Në lidhje me ngjarjen e dhënë për shtyp ditën e djeshme, mbi rastin e dhunimit të një shtetaseje, ju sqarojmë se: 28-vjeçarja është paraqitur për ndihmë në shërbimet e emergjencës mjekësore me datë 15.04.2023, ku është njoftuar dhe Policia, dhe me marrjen e këtij informacioni, Komisariati i Policisë Nr. 2 ka reaguar menjëherë me profesionalizëm për dokumentimin e plotë ligjor të ngjarjes dhe vënien e autorëve përpara përgjegjësisë penale, dhe ka shpallur në kërkim autorin e dyshuar të ngjarjes shtetasin G. G., 31 vjeç, i cili është arrestuar pak orë pas shpalljes në kërkim.
Gjithashtu, në lidhje me këtë rast janë arrestuar për veprat penale “Moskallëzimi i krimit” dhe “Veprime që pengojnë zbulimin e së vërtetës”, shtetasit B. N., dhe A. Sh., si dhe për veprën penale “Përkrahja e autorit të krimit”, shtetasit B. K., dhe E. K. Policia e Shtetit ka marrë të gjitha masat e nevojshme për sigurimin e jetës së saj, gjatë qëndrimit në spital si dhe jashtë ambienteve të tij, si dhe gjithashtu të familjarëve të saj./abcnews.al
