Kryediplomati kroat u kërkon 5 anëtarëve të BE-së ta njohin Kosovën: Do të stabilizohej rajoni

schedule15:29 - 16 Qershor, 2021

schedule 15:29 - 16 Qershor, 2021

Ministri i Jashtëm kroat, Gordan Grlic Radman,  këtë të mërkurë ka deklaruar se vendi I tij po bën të pamundurën për të ndihmuar Kosovën që të njihet dhe nga anëtarët e fundit të BE-së.

Ndërkohë kujtojmë se në vitin 2008, Kosova ka shpallur pavarësinë, dhe deri më tani njihet nga mbi 100 vende, përfshirë të gjithë anëtarët e BE-së përveç Qipros, Greqisë, Rumanisë, Spanjës dhe Sllovakisë.

Kroacia inkurajon pesë anëtarët e tjerë të BE ta njohin Kosovën, sepse kjo do të kontribuonte në stabilizimin e rajonit dhe vetë Kosovës, u tha Grlić Radman gazetarëve.

Sot, ai po merr pjesë në konferencën ndërkombëtare GLOBSEC në Bratislavë, ku do të diskutohet edhe për situatën në Ballkanin Perëndimor.

Kryediplomati kroat tha se tri gjëra janë thelbësore për stabilitetin e rajonit: respektimi i integritetit territorial të shteteve, barazia kushtetuese e boshnjakëve, serbëve dhe kroatëve në Bosnje e Hercegovinë dhe vendosja e besimit të ndërsjellë pas luftërave të viteve 1990.

“Integriteti territorial i vendeve të Ballkanit duhet të ruhet dhe respektohet. Pa rivendosur kufijtë, siç kemi dëgjuar muajt e fundit duke qarkulluar disa non-papers të famshëm që ishin drejtuar në atë drejtim”, tha Grlić Radman.

Ai beson se mirëbesimi mund të arrihet përmes bisedave të ndershme, zgjidhjes së fatit të të zhdukurve, ndjekjes penale të krimeve të luftës dhe dhënies së drejtësisë për viktimat.

Duke folur për BeH, ai tha se vendi është bllokuar midis dy tendencave politike – centralizmit ose unitarizmit dhe separatizmit./abcnews.al