Kodi Zgjedhor, Gjiknuri i përgjigjet Hajdarit: T’i japim kohë PD-LSI që të paraqesin propozimin e tyre

schedule10:47 - 21 Shtator, 2020

schedule 10:47 - 21 Shtator, 2020

Bashkëkryetari i Këshillit Politik për Reformën Zgjedhore Damian Gjiknuri i është përgjigjur propozimit të bërë dje nga, përfaqësuesja e opozitës parlamentare, Rudina Hajdari.

Duke konfirmuar gatishmërinë për të diskutuar me qëllim arritjen e një konsensusi, Gjiknuri shkruan se, në cilësinë e përfaqësuesit të mazhorancës kërkoi nga përfaqësuesit e tjerë të Këshillit Politik që të sjellin opinionin në raport me draftin e PS ose propozime alternative.

Po ashtu, Gjiknuri kërkon mirëkuptim për t’i dhënë “kohën e nevojshme edhe përfaqësuesve të opozitës jashtëparlamentare që të paraqesin dhe ata propozimet e tyre konkrete për amendamentet e Kodit Zgjedhor.”

“Në rast se opozita jashtëparlamentare, brenda afateve që na ka caktuar Kuvendi, do të vazhdojë të refuzojë ftesën për të dhënë kontributin e saj me amendamente konkrete të Kodit Zgjedhor, Ju si opozitë parlamentare keni gjithsesi të drejtat dhe hapësirat e plota ligjore për t’i bërë amendamentet tuaja pjesë të diskutimit që do duhet të zhvillohet padiskutim në Komisionin Parlamentar për Çështjet Ligjore dhe grupin përkatës të punës ku përfaqësohet si mazhoranca ashtu edhe minoranca në Kuvend,” thuhet më tej në reagim.

Përgjigja e plotë e Gjiknurit

“E nderuar zonja Hajdari,

Në mbledhjen e fundit të Këshillit Politik, Partia Socialiste depozitoi amendamentet e saja për ndryshimet në Kodin Zgjedhor si reflektim i ndryshimeve Kushtetuese të hyra tashmë në fuqi. Amendamente që në gjykimin tonë garantojnë plotësisht parimet kushtetuese për hapjen 100% të listave ashtu sikurse sigurojnë të drejtën e çdo qytetari për të vlerësuar nominalisht me votë preferenciale secilin kandidat e më tej duke ri rënditur listën përpara ndarjes përfundimtare të mandateve. Gjithësesi, duke konfirmuar se jemi plotësisht të gatshëm të diskutojmë rreth propozimeve tona me synim arritjen e një produkti me konsensus sa më të gjërë, në cilësinë e përfaqësuesit të mazhorancës kërkova nga përfaqësuesit e tjerë të Këshillit Politik që të sjellin opinionin në raport me draftin tonë ose propozime alternative.

Gjej rastin të ju falenderoj që Ju zonja Hajdari ju përgjigjet pozitivisht thirrjes për të kontribuar në mënyrë aktive, me propozime konkrete. Duke qenë se Këshilli Politik u krijua si strukturë ekstra-parlamentare, me synim primar përfshirjen e kontributit të opozitës jashtëparlamentare në procesin e reformës zgjedhore, do kërkoja mirëkuptimin tuaj për ti dhënë kohën e nevojshme edhe përfaqësuesve të opozitës jashtëparlamentare që të paraqesin dhe ata propozimet e tyre konkrete për amendamentet e Kodit Zgjedhor. Duke patur kontributin konkret me drafte nga të gjitha palët në Këshill, mund të kryejmë më pas procesin e negocimit në këtë strukturë ekstra-parlamentare, për një produkt me konsensus sa më të gjërë të mundshëm.

Në rast se opozita jashtëparlamentare, brenda afateve që na ka caktuar Kuvendi, do të vazhdojë të refuzojë ftesën për të dhënë kontributin e saj me amendamente konkrete të Kodit Zgjedhor, Ju si opozitë parlamentare keni gjithësesi të drejtat dhe hapësirat e plota ligjore për ti bërë amendamentet tuaja pjesë të diskutimit që do duhet të zhvillohet padiskutim në Komisionin Parlamentar për Çështjet Ligjore dhe grupin përkatës të punës ku përfaqësohet si mazhoranca ashtu edhe minoranca në Kuvend.

Duke ju ftuar të depozitoni një kopjo të propozimeve tuaja zyrtarisht edhe pranë Komisionit Parlamentar për Çështjet Ligjore, mbetemi në pritje që opozita jashtëparlamentare të depozitojë në Këshillin Politik ose në Kuvendin e Shqipërisë propozimet konkrete për amendamentet e Kodit Zgjedhor në zbatim të ndryshimeve Kushtetuese të 30 Korrikut.”

Kujtojmë se, të dielën, e zhgënjyer nga socialistët Rudina Hajdari ka bërë një propozim të ri për listat e kandidatëve për deputetë.

Ndërsa kërkoi hapjen 100% të listave Hajdari propozoi që emrat e kandidatëve të mos radhiten sipas numrave të përcaktuara nga kryetari i partisë por sipas rendit alfabetik.

Hajdari nuk e fshehu zhgënjimin nga socialistët në mbledhjen e fundit të Këshillit Politik kur u përball me propozimin e Damian Gjiknurit për listat e kandidatëve për deputetë.

Duke e cilësuar draftin e shumicës si një propozim që i mban të mbyllura listat, Hajdari në emër të grupimit të saj të ri politik ka propozuar një formulë të re për shpërndarjen e mandateve, ku zgjedhësit zgjedhin 100% të kandidatëve që do të hyjnë në parlament.

Rudina Hajdari propozoi një formulë të ngjashme me atë që kreu i demokratëve, Lulzim Basha kërkoi të zbatohet në zgjedhjet e ardhshme, ku zgjedhësit kanë mundësi të votojnë fillimisht forcën politike, njëkohësisht të kenë të drejtën për një zgjedhje preferienciale të një prej kandidatëve, lista e të cilëve të mos jetë renditur nga kryetari i partisë por të jetë hartuar në rend alfabetik. s.b/ abcnews.al/