bledar toci
nev ila12:25 | 03/11/2019
Gjykata e Apelit në Durrës ka lënë në burg policin Bledar Toçi, i akuzuar për vrasjen e Dritan Haxhollit.
Në seancën e sotme gjykata ka lënë në fuqi masën “arrest me burg” për Toçin, dhënë më herët nga gjykata e Kavajës.
Ngjarja e rëndë ndodhi pak javë më parë në banesën e Marsida Qatjas në Kavajë.
Efektivi i burgjeve pas një konflikti në banesën e Qatjas qëlloi me armë Haxhollin duke e lënë të vdekur në vend.
Fillimisht u tha se 30-vjeçarja ishte “mollë sherri” për ngjarjen e rëndë, ndërsa prokuroria heton edhe pistën e prishjes së pazareve të drogës.
Gjykata e Kavajës ka dhënë po ashtu masën “detyrim paraqitje” për Qatjan, ndërsa është thirrur disa herë për t’u marrë në pyetje për shkak të dëshmive të saj kontradiktore./abcnews.al
nev ila15:26 | 20/10/2019
Shefi i sigurisë së paraburgimit të Durrësit Bledar Toçi, që vrau me armën e shërbimit Dritan Haxhollin, kishte një vit që ishte emëruar në atë detyrë. Ai më herët ka shërbyer edhe në Gardën Republikës për gati shtatë vite, duke pasur probleme disiplinore dhe për këtë arsye ishte pezulluar disa herë nga detyra.
Bledar Toçi ish-shefi i sigurisë në paraburgimin e Durrësit, ka qenë një person me probleme të shumta disiplinore, edhe në kohën kur ka shërbyer për gati 7 vite në Gardën e Republikës.
31-vjeçari Toçi, kishte afërsisht një vit që ishte emëruar në kryer të sigurisë së burgjeve, dhe për këtë transferim dyshohet se ka pasur ndërhyrje edhe nga Partia Socialiste e qytetit të Durrësit.
I riu ishte skeduar nga Drejtoria e Sigurimit të Informacionit të Klasifikuar, si person i papërshtatshëm dhe i dyshuar se ka lidhje me eksponentë të dyshimtë të botës së krimit.
Por problemet kanë vazhduar edhe më pas, për Bledar Toçin. Polici i burgjeve, qëlloi me armën e shërbimit dhe la të vdekur në vend Dritan Haxhollin, në banesën e Mardisa Qatjas, në qytetin e Kavajës rreth 2 javë më parë.
ABC News ka mundur të sigurojë nga grupi hetimor se, Toçi ka shërbyer 4 vite me trupshërbimin e Presidencës, gjatë viteve 2013-2017. Edhe pse nuk janë bërë publike, i riu ka pasur disa vërejtje për “largim nga puna” apo “pezullim të ushtrimit të detyrës në Gardën e Republikës“.
Për këto arsye, Shërbimi i Kontrollit të Brendshëm ka kërkuar që Bledar Toçi të largohej nga trupshërbimi i Presidencës, dhe të emërohet në një pozicion tjetër duke u ulur në detyrë. Ai u transferua te Njësia e Tretë e Gardës së Republikës, apo siç njihet ndryshe edhe si Sigurimi i Rrugë-kalimeve për personalitetet e larta.
Në atë detyrë, Toçi ka pasur përsëri probleme me disiplinën, pasi shumë herë, nuk ishte gjetur në vendin e përcaktuar të punës, duke marrë “vërejte për largim nga detyra“.
31-vjeçari tashmë ka lënë ambientet e spitalit të Durrësit, dhe është dërguar në spitalin e burgut, aty ku do të qëndrojë deri në përmirësimin e plotë të shëndetit të tij. Toçi i cili mbeti edhe vetë i plagosur gjatë përplasjes me armë, ndodhet nën masën e sigurisë “arrest me burg” të dhënë nga gjykata e Kavajës 7 ditë më parë.
Për Toçin, prokuroria ka ngritur dy akuza, atë të “vrasjes me dashje” si dhe “prodhim dhe trafikim të lëndëve narkotike”. I gjithë krimi u zhvillua në shtëpinë e Marsida Qatjas në Kavajë./abcnews.al
ad min15:14 | 16/10/2019
Banorët në Kavajë e njihnin si person agresiv dhe inatçor Dritan Haxhollin, por frikë e kishin edhe punonjësit e policisë. 41-vjeçari jetonte me nënën e tij dhe e bija e takonte herë pas here.
Banorët në periferi të Kavajës, ajo që quhet lagja numër 4, e njohin mirë Dritan Haxhollin. Por askush nuk do të flasë publikisht për 41-vjeçarin. Në një shtëpi private, jetonte vetëm me nënën e tij. I divorcuar herë pas here vizitohej nga e bija 15 vjeçare.
Një fqinj kujton se pas kthimit nga emigracioni disa vite më parë, burri që u vra në shtëpinë e ish të dashurës, u shfaq me profilin e një njeriu të zemëruar. Burime të ABC News në prokurorinë e Kavajës treguan për një person që përdorte lëndë narkotike dhe që ishte në mbikëqyrje për trafikim të tyre.
Ishte karakter i vështirë, i inatosur dhe i egër, me një rreth të kufizuar miqsh që më shumë vinin nga jashtë Kavajës. Kështu njihej në opinion. Me ardhjen nga Greqia, u shtuan dhe lajmet për krimet të mundshmë jashtë kufirit.
EKSKLUZIVE/ Dritan Hoxholli duhej të ishte në burg natën që shkoi për të vrarë
“Ka bërë burg shumë atje dhe këtu”, thotë një banor i lagjes. Njerëzit e kishin frikë. Të njëjta referenca gjen edhe në Policinë e Kavajës. Një punonjes i komisariatit kujton se në një rast shkuan për ta arrestuar.
Dikush që e njihte mirë Haxhollin u doli para dhe u preu rrugën. Ku shkoni pa përforcime, do t’u vrasë. Në shtëpinë e tij ka dhe antitank. Ka gjuajtur me të. Policet u zbrapsën kurse dëshmitë për kanosje e kërcënime sa vinin dhe shtoheshin në popullatë.
Lajmi se Dritan Haxhollin nuk mund ta arrestonte kush shkoi deri në Policinë e Shtetit. Një zyrtar i tha ABC News se ishte përgatitur plani dhe operacionet do të niseshin ne Kavaje për ta kapur jo më larg se një dite pasi ndodhi ngjarja.
Dhe kur ai u vra në shtëpinë e Marsida Qatjes për policinë rasti u pa si lehtësim. Më pak shpenzime, më pak rrezik./Redaksia e korrepondentëve-ABC News Albania
ad min11:21 | 16/10/2019
Përgjegjësi i sigurisë së Brendshme të Burgut Durrës, Bledar Toçi që qëlloi me armën e shërbimit dhe la të vdekur Dritan Haxhollin e për pasojë mbeti dhe vetë i plagosur, ka lënë një nga dhomat e reanimacionit.
36-vjeçari ndodhet i shtruar në një nga dhomat e infektivit në spitalin e Durrësit. Kjo lëvizje vjen në një kohë që gjendja e tij shëndetësore sipas mjekëve ishte e mirë dhe pritej transferimi i tij drejt ambienteve të paraburgimit.
Nuk dihet pse 36-vjeçari është shtruar në një nga dhomat e infektivit, pasi mjekët e këtij reparti mbeten të rezervuar në dhënien e këtij informacioni. Edhe në këtë repart Bledar Toçi ruhet nga efektivë të policisë.
Ai ndodhet nën masën e sigurisë arrest me burg të dhënë nga Gjykata e Kavajës të dielën e kaluar. Mbi Toçin prokuroria ka ngritur dy akuza atë të vrasjes me dashje si dhe prodhim dhe trafikim të lëndëve narkotike. E gjithë ngjarja u zhvillua në shtëpinë e Marsida Qatjas në Kavajë./abcnews.al
Autor E09:38 | 15/10/2019
Mbrëmjen e djeshme, Marsida Qatja ka bërë deklaratën e fortë në Open se ngjarja në Kavajë nuk do të mbyllet me kaq.
Kjo sipas saj sepse bashkëshorti i saj I.Hyseni i cili aktualisht vuan dënimin në Gjermani, nuk e fal gjithë këtë.
Ajo ndër të tjera ka thënë se është e bindur se ngjarja e Kavajës e katër ditëve më parë, ku një person mbeti i vrarë dhe një tjetër i plagosur, nuk ka për t’u mbyllur me kaq.
Marsida tha se nuk ka patur asnjë marrëdhënie me viktimën Dritan Haxholli dhe as me të plagosurin Bledar Toci.
“Kam deklaruar se Dritani nuk ka patur asnjë marrëdhënie me mua, as Bledari gjithashtu. Më bënë një test droge dhe dola që nuk jam konsumuese, unë ushqej fëmijën me gji.Marrëdhënia me burrin tim është shumë e mirë. Por kjo histori nuk mbyllet me kaq për shkak të burrit tim. Ai është serioz, nuk fal, nuk duron asgjë, nuk është tolerant dhe normalisht më ka marrë çdo një minutë duke më kërkuar si është e vërteta. Ai thotë se mediat nuk më interesojnë, por është folur kaq gjatë dhe ai nuk e di… Mediat flasin dhe nuk e kuptojnë që po më shkatërrojnë familjen. Më vjen keq për Dritanin, por ai nuk kishte asgjë për të humbur, nuk kishte as njerëz që e donin dhe as shoqëri. Unë isha me punë, me shoqëri, me familje, me punë, ikisha të gjitha dhe i humba”, thotë Marsida.
ent ela14:07 | 13/10/2019
Të dy vëllezërit Toçi kanë mbetur në burg. Gjykata e Kavajës la në burg fillimisht vëllain e Bledar Toçit, Berndard Toçin dhe më pas në ambjentet e spitalit të Durrësit komunikoi masën arrest me burg për Bledar Toçin.
Bledar Toçi, polici i cili akuzohet për vrasjen e Dritan Haxhollit në shtëpinë e Marsida Qatjas do të qëndrojë në burg.
Masa iu komunikua në ambjentet e spitalit të Durrësit aty ku po mbahet nën kujdesin e mjekëve, për shkak të gjendjes së tij shëndetësore, pasi gjatë ngjarjes mbeti edhe vetë i plagosur.
Nga shtrati ku ndodhet i shtruar prokurori i çështjes i komunikoj akuzat 36 vjeçarit atë të vrasjes me dashje dhe prodhim dhe shitje të lëndëve narkotike.
Provat e siguruara në vendngjarje dhe referuar dëshmisë së personave prezentë në momentin e krimit ka dyshime që kemi të bëjnë me atë të vrasjes me dashje, kryesisht referuar 16 plumbave të qitura nga pistoleta e Bledar Toçit.
Në seancën e mbajtur me dyer të mbyllura 36 vjeçari nuk ka folur vetë, por nëpërmjet avokatit të tij ka pohuar se gjithçka ka ndodhur në kushtet e vëtëmbrojtjes.
Fillimisht sqaron avokati kundrejt Bledarit, Dritan Haxholli ka qëlluar dy herë, ndërsa në kushtet e vetëmbrojtjes ai ka qëlluar më pas mbi 41 vjeçarin duke e lënë të vdekur.
Avokati tha se do ta apelojnë vendimin, ndërsa akuza e dytë ajo e trafikimit dhe shitjes së lëndëve narkotike ende nuk është sqaruar.
Arrestimi i Toçit erdhi pas ngjarjes që ndodhi brenda në shtëpinë e Marsida Qatjas, aty ku vrau Dritan Hoxhollin dhe mbeti i plagosur edhe vetë me herët nga viktima.
Më herët në Gjykatën e Kavajës u dha masa për Bernard Toçin vëllain e Bledar Toçit, për veprën penale të prodhimit dhe shitjes së lëndëve narkotike. Prokurori i çështjes, Gëzim Çopa u tha se të marra nga Xhulio Bitarku, kokaina e konsumuar natën e vrasjes së 41 vjeçarit e kishte marrë nga Bernard Toçi.
Mirëpo kjo deklaratë e prokurorit është hedhur poshtë nga avokati mbrojtës Altin Sinelli. Sipas tij 3,4 gram kokainë e ndarë në 7 doza dhe e gjetur në shtëpinë e familjes Toçi nuk është e Bernardit.
Në këto kushte avokati e quajti të paligjshëm arrestimin e klientit të tij. Ai tha se Bernardi nuk ka lidhje me ngjarjen dhe se prokuroria ka harruar të pyesë se në shtëpi ishin katër persona, nëna, babai dhe vëllai tjeteër i Bernardit.
Sipas avokatit, droga e gjetur në banesë i përkiste babait, Kujtim Toçit, i cili vuan nga një sëmundje e rënde dhe se kokainën e përdorte si qetësues.
I pyetur jashtë sallës së gjyqit, Kujtim Toçi, për vërtetësinë e thënieve të avokatit, mohon gjithçka, madje përpara kamerave ai thotë se nuk është babai i Bernardit.
Avokati i Bernard Toçit, u shpreh se arrestimi i klientit të tij është bërë përpara se të merreshin deklarimit e protagonisteve të ngjarjes. Madje shtoj se ai është arrestuar pasi ka qenë i dënuar edhe më parë. Momentalisht Bernardi vuan një tjetër dënim, për veprën penale të trafikimit të lëndëve narkotike. Ai është dënuar me kusht për këtë vepër. Pavarësisht thënieve në sallë të avokatit mbrojtës, gjykata e Kavajës e konsideroi të ligjshëm arrestimin e Bernard Toçit duke lënë masën personale të arrestit me burg. /ABC News Albania 24/7
ent ela12:12 | 13/10/2019
Pas dhënies së masës së sigurisë arrest me burg ndaj Bledar Toçit ka reaguar edhe avokati i tij Luan Mansaku. Në një prononcim për mediat Mansaku tha se Bledar Toçi ka qenë në kushtet klasike të vetëmbrojtjes sepse ndaj Bledarit është qëlluar dy herë me armë.
“Bledar Toçi ka qenë në kushtet klasike të vetëmbrotjes sepse ndaj bledarit është qëlluar dy herë me armë, janë të dhënat në dosje. Masa e kërkuar nga prokurori nuk përputhet me atë që thotë ligji. Ne kërkuam për këto arsye arrest në shtëpi”. /abcnews.al
ent ela11:57 | 13/10/2019
Bledar Toçi polici që vrau Driatn Hoxhollin në shtëpinë e Marsida Qatjas do të qëndrojë në burg. Masa e sigurisë ndaj tij iu dha në ambjentet e spitalit në Durrës ku dhe është shtruar. Toçi akuzohet për vrasje me dashje të Dritan Hoxhollit dhe trafikim të lëndëve narkotike.
Toçi i cili mori një plumb në qafë, vrau me Hoxhollin me armën e tij të shërbimit në kushtet e vetëmbrojtjes.
Të paktën ky është versioni i policisë, ndërkohë që në vendngjarje janë gjetur 17 gëzhoja.
Toçi ndodhej në shtëpinë e Marsida Qatjas bashkë me një tjetër shok të saj. Kur ish i dashuri 30 vjeçares hyn në shtëpi e qëllon me kallashnikov, ndërsa Toçi kundërpërgjigjet duke e lënë të vdekur në vend. /abcnews.al
nev ila15:48 | 12/10/2019
“Abc News” zbardh rrëfimin e autorit të vrasjes në Kavajë, Bledar Toçi, dhënë mëngjesin e sotëm nga ambientet e spitalit të Durrësit. Para oficerëve të policisë gjyqësore ai deklaroi se u thirr nga Marsida pas problemeve që kishte me Haxhollin. Përplasja mes dy burrave ka ndodhur nga një distancë 2 metra, ndërsa ekspertiza do të përcaktojë numrin e saktë të plumbave në trupin e viktimës.
Polici i plagosur Bledar Toçi është marrë në pyetje nga oficerët e policisë gjyqësore.
Në dëshminë e tij ai ka thënë se u thirr nga Marsida pas përndjekjeve të vazhdueshme që i bëheshin asaj nga Dritan Haxholli. Toçi nuk ka dhënë shumë detaje rreth ngjarjes.
Rrezikun për jetën e ka kaluar dhe është i aftë për të komunikuar me këdo që hyn e del nga dhoma e repartit ku është shtruar.
Pavarësisht kësaj ai nuk është transferuar në ambientet e paraburgimit pasi mjekët kanë vlerësuar se duhet të mbahet ende në vëzhgim.
Nga hetimet e deritanishme por edhe nga dëshmitë e Bledar Toçit , rezulton se Dritan Haxholli ka qëlluar policin nga një distancë dy metër duke e lënë të plagosur. Kurse Toçi i është kundërpërgjigjur me disa të shtëna Haxhollit . Për pasojë 41 vjeçari gjeti vdekjen. Aty ndodhej Marsida Qatja dhe Xhulio Biturku kurse fqinji tjetër ishte larguar për të marrë pije dhe ushqime.
Në trupin e Haxhollit janë gjetur disa plumba, por ekspertiza mjeko ligjore do të përcaktojë numrin e saktë të tyre. Nga këqyrja e vendit të ngjarjes në banesë janë gjetur rreth 17 gëzhoja prej të cilave 16 i përkasin pistoletës së Bledar Toçit.
Sasia e madhe e gëzhojave të mbetura nga qitja me armë e policit të burgjeve, ngre dyshime se punonjësi i policisë, ka qëlluar në kushtet e vetëmbrojtjes.
Nga hetimet mësohet gjithashtu se viktima Dritan Haxholli që prej dy javësh para se të ndodhte ngjarja ka qenë me vendim arresti me burg në mungesë për mosbindje të punonjësve të policisë dhe largim nga vendngjarja.
Abc news u përpoq të kontaktonte me Bledar Toçin në ambientet e spitalit por nga pas derës sapo ai dëgjoi se mediat po interesoheshin për të, u përgjigj se:
“Nuk ndodhet këtu por ka ikur në Tiranë”. Në këtë mënyrë ai përpiqet të shmangë interesin e mediave.
Bledar Toçi, ruhet nga dy policë të cilët ndodhen në hyrje dhe në brendësi të dhomës.
Deri tani oficerët e policisë gjyqësore nuk janë të bindur në deklarimet e Toçit dhe Marsida Qatjas, pasi sipas tyre edhe në deklaratat e fundit, ata ende vazhdojnë të japin deklarime kontradiktore, përfshirë këtu edhe ato në media./abcnews.al
ad min15:41 | 11/10/2019
Dëshmia e Bledar Toçit konsiderohet grupi hetimor si shumë e rëndësishme. Ai ka thënë se, Dritan Haxhollin e kishte qëlluar në kushtet e vetëmbrojtjes. Më herët shefi i sigurisë së paraburgimit të Durrësit ka qenë më herët efektiv i Gardës së Republikës.
Pas ngjarjes së rëndë të ndodhur në orët e para të së enjtes në qytetin e Kavajës, Abc Neës ka zbardhur dëshminë e policit të burgjeve Bledar Toçi.
31-vjeçari dyshohet se, ka qëlluar me armën e shërbimit Dritan Haxhollin, në ambientet e brendshme të shtëpisë së Marsida Qatjas.
Toçi ka deklaruar para oficerëve të policisë gjyqësore se Qatja e kishte telefonuar të mërkurën pasdite duke i thënë se, Haxholli po e kërcënonte.
“Më mori Marsida në telefon të mërkurën pasdite dhe më tha se Dritani e kërcënonte. Unë i thashë se do ta ndihmoja. Dhe ashtu bëra. Ajo është një grua e vetme dhe nuk ka njeri tjetër për ta ndihmuar. Nuk mendova dy herë kur më tha se Dritani në darkë do vinte t’i merrte fëmijën e mitur, pasi kishin disa kohë që ishin ndarë”, është shprehur Toçi.
Ai shton gjithashtu se ka qëlluar për vetëmbrojtje dhe nuk ka patur qëllim për ta vrarë.
“Marsida më tha se Dritani vjen zakonisht natën aty dhe për këtë arsye unë qëndrova në mbrëmje së bashku me Xhuljo Biturkun dhe Ermir Çelën. I thamë Marsidës se, do i bënim ne presion Dritanit që të mos e shqetësonte më. Sapo ia hapa derën Dritani ai filloi të shante dhe i tha Marsidës që e paske futur dashnorin në shtëpi. Ai hapi zjarr direkt me automatik pa më lënë kohë që unë ta sqaroja. Unë ndërhyra për t’ia marrë kallashnikovin por nuk munda dhe mbeta i plagosur . Armën e shërbimit e kisha me vete pasi, sapo kisha mbyllur turnin. Dy të tjerët që ishin në banesë janë shok të burrit të Marsidës. Unë kamë qëlluar për vetëmbrojtje”.
Bledar Toçi më herët ka qenë edhe punonjës i Gardës së Republikës, ndërsa kishte disa muaj që ishte vendosur si shef i sigurisë së paraburgimin e Durrësit./ABC News Albania 24/7
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
17:58 | 30/03/2020
17:41 | 30/03/2020
