Kolegji Zgjedhor ka rrëzuar kërkesën e PD dhe LSI për pavlefshmëri të zgjedhjeve në qarkun e Gjirokastrës. Në një deklaratë për mediat, përfaqësuesi i PD Ivi Kaso dhe ai i LSI, Altin Kaziaj u shprehën se vendimin nuk e pranojnë.
Kaso tha se është i keqardhur që kërkesa e PD për prova shtesë nuk u pranua dhe që u vlerësua si kërkesë që nuk lidhet me fakte konkrete të ndodhura në Gjirokastër.
Sipas tij, fakte dhe prova të tjera do të dalin çdo ditë nga ajo që PD e cilëson si masakra zgjedhore.
“Ne si PD nuk kemi hequr dorë dhe nuk do të heqim. Ky ka qenë një nga proceset elektorale, më të ndikuar nga interesat e mazhorancës, që ishte vendosur me çdo kusht që të mos i lejonte shqiptarët të votonin të lirë.”
Të njëjtin qëndrim mbajti edhe Kaziaj, i cili tha se vendimi u mor në një afat kohor shumë të shkurtër.
“Nuk ka si pranohet që dhënia e një vendimi në një afat kohor kaq të shkurtër, ky është absurditet…Në këto zgjedhje janë formatuar aq kërkesa, saqë në gjithë zgjedhjet e tjera bashkë nuk kanë qenë.” /abcnews.al/
