Parlamenti rrëzoi me 72 vota kundër të mazhorancës ndryshimet kushtetuese për prokurorin e Përgjithshëm, të propozuar nga opozita. Propozimi konsistonte në zgjedhjen e një Prokurori të Përgjithshëm të Përkohshëm, mes kandidaturash të propozuara nga Gjykata Kushtetuese dhe që fillimisht kalojnë Vettingun, për t’u zgjedhur me 3/5-tat e votave në Parlament.
Parlamenti rrëzoi me votat e mazhorancës projektligjin për ndryshimet Kushtetuese të propozuara nga demokratët për Prokurorin e Përgjithshëm.
Projektligji propozonte, thelbësisht, kthimin në binarët kushtetues të figurës së Prokurorit të Përgjithshëm të Përkohshëm, sot në detyrë bazuar në një procedurë in-ekzistente Kushtetuese. Për demokratët qëllimi i mazhorancës për rrëzimin e këtij propozimi është i qartë po aq sa arsyeja. Kjo e fundit ka për protagonist kampionin e kryeministrit, ish-ministrin Saimir Tahiri.
Lëshimi i pasaportës së Saimir Tahirit dhe ekstradimi i dëshmitarit kyç Nazer Seiti, janë fillimi i një procesi të gjatë, tha Bylykbashi, që kapjen e sistemit e bën përmes një prokuroreje që nuk ka kaluar vettingun por përgatit dosjet për rivlerësimin e vartësve të saj.
Shans i panevojshëm është për socialistët, në emër të të cilëve relatoi Alket Hyseni.
Relatori Hyseni e di se afati kushtetues për ngritjen e KLP ka përfunduar 8 muaj pas hyrjes në fuqi të ndryshimeve kushtetuese të Korrikut 2016 dhe pikërisht mos-ngritja e këtij institucioni solli zgjedhjen e Prokurores së Përkohshme. Kjo edhe pse Kushtetuta nuk përmend në asnjë gërmë të saj Prokurorin e Përgjithshëm të Përkohshëm.
Kështu mendon edhe Oerd Bylykbashi, i cili qëllim kryesor të zonjës Marku, sheh influencën e saj në përzgjedhjen e antarëve prokuror të Këshillit të Lartë të Prokurorisë, shumica e së cilit përzgjedh edhe prokurorët e prokurorisë special anti-korrupsion që do të hetojë funksionarët e lartë./abcnews.al
