Champions League tani nuk ndalet. Sonte është mbrëmja e ekipeve jo favorite, por që mund të prodhojnë ndeshje nga më të bukurat. Në fushë do të jetë edhe një shqiptar, Berat Djimsiti. Atalanta e tij pret Valencian, që ka disa mungesa, dhe kërkon të shfrytëzojë faktorin fushë.
Skuadra e Gasperinit në Serie A ka treguar një formë të mirë dhe Valencia është nga ato ekipe që mund të kalohet. Edhe spanjollët në krahun tjetër kanë buzëqeshur kur kanë mësuar shortin dhe sonte do mundohen të hedhin një hap përpara për kualifikimin.
Takim interesant është edhe ai mes Tottenham dhe RB Leipzig. Londinezët nuk kanë Harry Kane dhe Heung-Min Son, çka i dobëson në sulm. Gjithsesi ata janë favoritë ndaj gjermanëve, që do të mundohen të mos humbin në Londër dhe ta diskutojnë çështjen e kualifikimit në shtëpinë e tyre. /abcnews.al
