Loading ...
Sipas Shtabit të Përbashkët të Ushtrisë së Koresë së Jugut (JCS), Koreja e Veriut ka lëshuar rreth 10 raketa balistike me rreze të shkurtër veprimi nga bregu i saj lindor drejt Detit të Japonisë.
Kjo ndodh më pak se një javë pasi Seuli propozoi bisedime lidhur me një mosmarrëveshje kufitare në rritje.
Raketat u lëshuan të enjten, rreth orës 12:30, nga një zonë pranë Wonsan-it, në bregun lindor të Koresë së Veriut, njoftoi JCS-ja përmes një deklarate.
Ministria e Mbrojtjes e Japonisë konfirmoi gjithashtu lëshimin e asaj që mund të jetë një raketë balistike, e cila ra jashtë Zonës Ekskluzive Ekonomike të Japonisë, raportoi agjencia e lajmeve “Kyodo News” me seli në Tokio.
Ky veprim vjen në një kohë kur tensionet janë shtuar për shkak të shpërthimit të një mine tokësore, e cila plagosi tre ushtarë koreano-jugorë në Zonën e Çmilitarizuar (DMZ) — një kufi i fortifikuar rëndë midis dy Koreve — më 21 shtator.
Një hetim i përbashkët mes Koresë së Jugut dhe Kombeve të Bashkuara, i kryer më herët gjatë këtij muaji, arriti në përfundimin se minat ishin vendosur nga Koreja e Veriut më shumë se një vit më parë; Seuli ka kërkuar një ndjesë për këtë ngjarje.
Pheniani e hodhi poshtë këtë përfundim dhe, gjatë kësaj jave, i dërgoi një letër Këshillit të Sigurimit të OKB-së, duke akuzuar Seulin se e ka trilluar shpërthimin.
Përfaqësuesi i përhershëm i Koresë së Veriut në OKB, Kim Song, shkroi për një “provokim të kryer nga Republika e Koresë [Koreja e Jugut], duke hedhur fajin pa asnjë bazë për ‘incidentin e dyshimtë të shpërthimit të minës'”.
Ai paralajmëroi se shkeljet e sovranitetit të vendit të tij mund të çojnë në veprime për vetëmbrojtje.
Song i deklaroi Këshillit të Sigurimit të OKB-së se pretendimet e Koresë së Jugut janë një “farsë për t’iu shmangur përgjegjësisë për tensionet në rritje të vazhdueshme në Gadishullin Korean”.
E Kim Yo Jong, motra me ndikim e liderit koreano-verior Kim Jong Un, i cilësoi kërkesat e Koresë së Jugut për ndjesë si “të neveritshme”, ndërsa njëkohësisht refuzoi një ofertë nga Seuli për pajisje mjekësore.
Koreja e Jugut ka propozuar bisedime ushtarake me fqinjin e saj, në përpjekje për të qetësuar situatën.
Të premten e kaluar, Seuli njoftoi se e kishte ftuar Phenianin për të diskutuar mbi rivendosjen e kanaleve të komunikimit.
Kjo ofertë vjen në një kohë kur aktiviteti ushtarak përgjatë kufirit po shtohet.
Mbetet e paqartë nëse Koreja e Veriut do të pranonte të hynte në bisedime.
Udhëheqësi Kim ka mbajtur një qëndrim të ashpër ndaj Seulit dhe, vitet e fundit, ka pezulluar pothuajse çdo dialog e bashkëpunim me Jugun.
Përshkallëzimi i tensioneve vjen në një kohë kur hapat e fundit të ndërmarra nga presidenti i Shteteve të Bashkuara, Donald Trump, drejt Phenianit, kanë ngritur shqetësime se Seuli – aleat i SHBA-së – mund të lihet mënjanë në bisedimet e mundshme bërthamore që përfshijnë Korenë e Veriut.
Pheniani lëshoi disa raketa balistike me rreze të shkurtër veprimi, një ditë pasi Trump la të kuptohet se mund të takohet me Kimin gjatë këtij viti.
