Loading ...
TIRANË- Mes reagimeve ndërkombëtare për sulmin e armatosur në një hotel në Washington DC gjatë një aktiviteti presidencial me gazetarë, ka reaguar edhe kryeministri Edi Rama, i cili e ka dënuar ashpër këtë akt dhune.
Përmes një postimi në rrjetin social X, Rama e cilësoi ngjarjen si tronditëse dhe theksoi se një sulm i tillë godet drejtpërdrejt lirinë dhe mënyrën demokratike të jetesës.
“Tronditëse të marrësh lajmin për një sulm të dhunshëm me armë nga një person i armatosur në një hotel në Washington, DC gjatë një aktiviteti presidencial me gazetarë. Një sulm i tillë godet lirinë dhe mënyrën tonë demokratike të jetesës kudo. E dënoj me forcë. I lehtësuar që POTUS dhe të gjithë të pranishmit janë të sigurt dhe mirë”, shkruan Rama.
Kryeministri shqiptar shprehu gjithashtu lehtësimin që presidenti amerikan dhe të gjithë pjesëmarrësit në aktivitet ndodhen jashtë rrezikut, ndërsa nënvizoi se ngjarje të tilla përbëjnë një kërcënim serioz për demokracinë, lirinë e medias dhe sigurinë publike.
Sulmi ka sjellë reagime të shumta edhe nga liderë të tjerë ndërkombëtarë, të cilët kanë dënuar dhunën dhe kanë kërkuar forcimin e masave të sigurisë në aktivitete të nivelit të lartë institucional.
/abcnews.al
