Sipas MeteoAlb vendi ynë që në orët e para të mëngjesit ka nisur nën mbizotërimin e kthjellimeve në pothuajse të gjithë ultësirën perëndimore.
Në zonat malore herë pas here shfaqen vranësirat e lehta. Këto kushte atmosferike do të na shoqërojnë edhe gjatë mesditës. Ndërsa pjesa e dytë e ditës i bën më të dukshme vranësirat, ku pritet të shfaqen pjesërisht edhe në ultësirën perëndimore.
Vija bregdetare pas mesdite do të vijoj të dominohet nga intervalet e gjata me diell.
Temperaturat e ajrit do të pësojnë rritje të lehtë në mëngjes, por nuk ndryshojnë në mesditë duke luhatur vlerat ditore nga 14°C vlera më e ulët deri në 36°C vlera më e lartë e cila pritet në qarqet; Elbasan dhe Berat.
Era do të fryjë mesatare në tokë dhe në det me shpejtësi 35 km/h nga drejtimi Veriperëndimor duke krijuar në brigjet detare dallgëzim 1 – 2 ballë.
Kosova
Republika e Kosovës përgjatë gjithë 24 orëve të ditës së shtunë parashikohet të jetë nën ndikimin e kushteve të qëndrueshme atmosferike, ku në orët e para të mëngjesit dhe gjatë mesditës kthjellimet do të jenë më të dukshme.
Ndërsa në pjesën e dytë të ditës vranësirat kalimtare do të shfaqen në të gjithë Kosovën por nuk do të sjellin reshje; Temperaturat e ajrit do të pësojnë një rritje të lehtë në vlerat
Minimale, por mbeten konstante maksimalet duke u luhatur nga 12°C vlera minimale deri në 29°C maksimalja në rang territori. Era do të fryjë mesatare me shpejtësi deri në 28 km/h nga drejtimi kryesisht veriperëndimor.
Maqedonia e Veriut
Që në orët e para të mëngjesit Maqedonia e Veriut ka nisur nën mbizotërimin intervaleve të gjata me diell dhe kalimeve të lehta të vranësirave, ku më të dukshme kthjellimet pritet të jenë në zonat Jugperëndimore.
Ndërsa pas mesdite parashikohet shtim i lehtë dhe gradual i vranësirave, por vranësirat nuk do të krijojnë mundësi për reshje në territor.
Temperaturat e ajrit do të vijojnë të rriten vlerat minimale, por mbeten konstante maksimalet duke luhatur vlerat ditore nga 13°C vlera minimale deri në 30°C vlera maksimale në rang vendi.
Ndërkohë; Era do të fryjë mesatare përgjatë gjithë ditës duke arritur shpejtësinë maksimale deri në 30 km/h nga drejtimi Veriperëndimor.
Europa
Britania e Madhe dhe Europa Lindore paraqiten nën mbizotërimin e kushteve të qëndrueshme atmosferike, duke bërë që në këto rajone të kontinentit të ketë alternime kthjellimesh dhe vranësirash të shpeshta.
Mbetet pellgu i Mesdheut me intervale të gjata me kthjellime në pjesën më të madhe të tij, por pritet që herë pas here në zona të izoluara të ketë kalime të lehta të vranësirave.
Ndërsa në brigjet e detit të Zi vranësirat do të jenë më të shumta duke gjeneruar rrebeshe afatshkurtra shiu.
Gjithashtu Europa Qendrore do të dominohet nga vranësirat dhe reshjet e shiu, të cilat herë pas here do të jenë në formë rrebeshi.
