Presidenti Donald Trump ka deklaruar se është i gatshëm të takohet me presidentin iranian, Hasan Ruhani, për të diskutuar mbi çështjen bërthamore.
Presidenti i Shteteve të Bashkuara, Donald Trump ka deklaruar se është i hapur për një takim me homologun iranian Hasan Ruhani, nëse ekzistojnë rrethanat e duhura. Deklarata e Trump vjen pasi ministri i Jashtëm iranian bëri ditën e diel një vizitë të shkurtër dhe të paparalajmëruar në samitin e G7-s në Francë. Marrëdhëniet mes Iranit dhe Amerikës janë përkeqësuar që kur Uashingtoni u tërhoq nga marrëveshja bërthamore e vitit 2015. Megjithatë, të hënën Trump tha se kishte një “parandjenjë pozitive” për një akord të ri me Republikën Islamike.
“Irani nuk është i njëjti vend që ishte dy vjet e gjysmë më parë, kur unë mora detyrën. Besoj se ai mund të bëhet një vend i madh, por nuk mund të ketë armë bërthamore”, tha Trump. Ai shtoi se, pala iraniane duhet të kthehet në një “lojtar të mirë” bisedimesh përpara se të bihet dakord për një takim me Ruhanin.
Më herët gjatë së hënës ishte presidenti iranian që tha se ishte i gatshëm të takohej me këdo nëse takimi do të ishte i leverdisshëm për Iranin. “Nëse pjesëmarrja në një sesion ose në një takim do të ndihmonte në zhvillimin e vendit tim dhe në zgjidhjen e problemeve të popullit, atëherë nuk do të hezitoja ta pranoja”, tha Ruhani. /ABC News Albania 24/7
