Real Madrid duket se e ka vendosur të “zaptojë” për një kohë të gjatë, futbollin evropian dhe me lojtarët që ka në “listën” e transferimeve, ky synim mund të arrihet fare kollaj.
Ndër emrat më të rinj në “listë” është talenti i Argjentinës, Enzo Fernandez. Mesfushori i Benfica-s performoi shkëlqyeshëm në Kupën e Botës 2022 në Katar dhe tërhoqi vëmendjen e klubeve kryesore evropiane, përfshirë “galaktikët”.
Në Madrid, Fernandez konsiderohet një lojtar i madh dhe trajneri Carlo Ancelotti e pëlqen shumë, megjithatë, klubi nuk është gati të paguajë 120 milionë eurot e kërkuara nga Benfica, pasi besojnë se shuma është “shumë e fryrë”.
Real Madridi nuk ka ndërmend të paguajë më shumë se 100 milionë për lojtarin, edhe pse e pranojnë se Fernandez është një lojtar i nivelit të lartë.
Më herët në media u raportua se PSG, Barcelona, Atlético Madrid, Manchester City, Manchester United, Tottenham, Chelsea, Arsenal dhe Inter janë të interesuar për 21-vjeçarin e kombëtares argjentinase, teksa të gjitha këto klube kanë qenë në kontakt me agjentin e Fernandez.
Ndërkaq, kujtojmë se në Kupën e fundit të Botës 2022, Fernandez u shpall, lojtari më i mirë i ri i kompeticionit. /i.m /abcnews.al
