merkato
Igli Nikolli14:32 | 30/03/2020
Real Madrid nuk e ka plotësuar akoma boshllëkun e krijuar nga largimi i Cristiano Ronaldos. Ylli portugez siguronte gola pafund dhe klubi spanjoll do të bëjë një përforcim të rëndësishëm në sulm këtë verë. Tre të preferuarit e Zinedine Zidane janë Sadio Mane, Erling Haaland dhe Pierre-Emerick Aubameyang.
Ky i fundit është zgjidhja e tretë. Po i pari? Mediat angleze raportojnë se ai është Haaland, bomberi i Dortmund. Trajneri francez e preferon më shumë se afrikanin e Liverpool. Një lajm pozitiv për Jurgen Klopp dhe tifozët e “The Reds”, të cilët shpresojnë ta shohin sërish në “Anfield” senegalezin.
Rikthehemi te Haaland. 19-vjeçari po konfirmohet një makineri golash edhe te Dortmund. Reali do të nisë shumë shpejt ofensivën dhe po përgatit një ofertë të parefuzueshme, edhe pse nuk do të jetë aspak e lehtë për të bindur klubin gjerman që të lërë të lirë yllin viking. /abcnews.al
Igli Nikolli12:53 | 30/03/2020
Financat nuk janë problem për Manchester United dhe klubi anglez do të realizojë disa përforcime në merkaton e verës. Objektivi i madh quhet Jadon Sancho, ylli i Borussia Dortmund, dhe akordi final është afër.
20-vjeçari anglez po zhvillonte një sezon fantastik me verdhezinjtë dhe është golashënuesi më i mirë i skuadrës me 14 gola të shënuar dhe 15 asiste të dhuruara në Bundesligë. Karrierën pritet ta vijojë në Premier League.
Manchester United, Liverpool dhe Chelsea po garojnë fort për shërbimet e anësorit ofensiv. Mediat angleze shohin si favorit “Djajtë e Kuq”, që kanë përgatitur një ofertë prej 130 milion eurosh për Dortmund. Një shumë e parefuzueshme për klubin gjerman, teksa do të jetë pothuajse e pamundur që Liverpool apo Chelsea të bëjën një ofertë më të madhe se kjo e United. /abcnews.al
Igli Nikolli10:18 | 30/03/2020
Xherdan Shaqiri do të largohet nga Liverpool në fund të këtij sezoni. 28-vjeçari nga Gjilani është aktivizuar shumë pak nga Jurgen Klopp dhe dëshiron të nisë një aventurë të re, në një skuadër ku mund të jetë titullar.
Dy janë alternativat për të ardhmen e lojtarit të kombëtares së Zvicrës: Roma dhe Sevilla. Football Insider raporton se verdhekuqtë italianë i janë rikthyer pistës Shaqiri, të cilin e tentuan në merkaton e janarit.
Trajneri Fonseca e pëlqen shumë, mbi të gjithë për faktin që lojtari mund të aktivizohet në shumë pozicione në fazën sulmuese. Roma duhet të fitojë garën me Sevilla, që e ka Shaqirin në krye të dëshirave dhe po tenton një akord me “The Reds”. /abcnews.al
Igli Nikolli09:16 | 30/03/2020
Lautaro Martinez ka bërë që tifozët e Interit ta harrojnë shumë shpejt Mauro Icardin. 22-vjeçari po zhvillonte një sezon fantastik dhe ka formuar një dyshe shumë të bukur sulmuese me Romelu Lukakun. 16 golat e shënuar këtë sezon kanë tërhequr vëmendjen e disa klubeve europiane, sidomos Barcelonës dhe Manchester City.
Interi nuk dëshiron ta shesë, presidenti Zhang e ka theksuar gjithmonë që nuk ka nevojë të shesë më të mirët dhe projekti zikaltër është në fillimet e tij. Një projekt ambicioz tek i cili Lautaro beson. Gazzetta dello Sport raporton se sulmuesi argjentinas nuk i ka kërkuar klubit të largohet. Ai ka një klauzolë largimi prej 111 milion eurosh, shumë që Barcelona dhe City janë gati ta paguajnë.
Nëse ndodh, Interi del jashtë loje dhe gjithçka varet nga dëshira e lojtarit. Një dëshirë që vazhdon të jetë zikaltër, Lautaro është në qendër të projektit të klubit italian, kjo gjë e bën të ndihet i rëndësishëm dhe ky fakt gëzon popullin zikaltër. /abcnews.al
Igli Nikolli21:39 | 29/03/2020
Gianluca Donnarumma do të jetë një nga largimet e Milanit këtë verë. Talenti i portës nuk ka pranuar rinovimin (kontrata i përfundon në verën e vitit 2021) dhe do të shitet nga kuqezinjtë. Interesimi për të është i madh, teksa një super ofertë po përgatitet nga Chelsea.
“Blutë e Londrës” kanë piketuar portierin e kombëtares italiane si zëvendësuesin e Kepa Arrizabalaga dhe janë gati të ofrojnë 60 milion euro për të sipas citimit të Sportmediaset.
Një shifër e mirë për Milanin, duke llogaritur faktin që 21-vjeçari futet në vitin e fundit të kontratës. Juventus dhe PSG janë klubet e tjera të interesuara për Donnarumma, por Chelsea shpreson të fitojë këtë garë. /abcnews.al
Igli Nikolli19:55 | 28/03/2020
Leroy Sane vazhdon të jetë një nga objektivat kryesorë të Bayern Munchen. Ditën e djeshme doli lajmi që drejtuesit e klubit gjerman i ofronin Manchester City shërbimet e David Alaba për të siguruar sulmuesin e majtë.
Një shkëmbim që është hedhur poshtë nga Karl-Heinz Rummenigge. CEO i Bayern ka lëshuar një batutë për TZ në lidhje me zërat që flasin për një shkëmbim Sane-Alaba.
“Më duhet të them që më duket si një përrallë nga vëllezërit Grimm, nuk ka asnjë lidhje me realitetin. Askush nuk e di se kur do të përfundojë emergjenca, kështu që nuk e kemi mendjen te merkato”, deklaron Rummenigge. /abcnews.al
Igli Nikolli18:18 | 28/03/2020
Manuel Neuer është më shumë larg se sa afër Bayern Munchen. Kapitenit i përfundon kontrata në verën e vitit 2021. Palët nuk po arrijnë një akord për rinovimin dhe portiere po sheh për ndonjë alternativë tjetër.
Vetë klubi gjerman do detyrohet ta shesë në fund të këtij sezoni nëse kontrata nuk zgjatet. Daily Mail raporton se Chelsea është futur në garë për shërbimet e 34-vjeçarit. Aventura angleze e tundon titullarin e kombëtares gjermane.
Po Bayern Munchen? Objektivi i madh është Marc-Andre Ter Stegen. Gjermani nuk ka rinovuar akoma me Barcelonën dhe një thirrje nga bavarezët është e vështirë për t’u refuzuar, teka kartoni i tij vlen rreth 100 milion euro. /abcnews.al
Igli Nikolli17:20 | 28/03/2020
Prej kohësh flitet për një transferim të Lautaro Martinez te Barcelona në fund të këtij sezoni. Klubi katalanas ka vendosur të investojë te sulmuesi i Interit, i cili ka një klauzolë largimi prej 111 milion eurosh.
Dëshira e madhe për të luajtur përkrah Leo Messit i ka mbushur mendjen sulmuesit zikaltër për të pranuar ofertën e Barcelonës, por ai ka një kusht. Sport.es raporton se 22-vjeçari ka kërkuar që të plotësohen dëshirat teknike të Interit.
Emra si Vidal, Semedo, Rakitic dhe Todibo, mund të përfshihen në këtë operacion dhe pritet të kalojnë në skuadrën e Antonio Contes. Nuk përjashtohet as një shkëmbim me Antoine Griezmann, me klubin italian që do gjente menjëherë pasuesin e Lautaros në sulm. /abcnews.al
Veronik Istrefaj16:59 | 28/03/2020
Zhvillime të shpejta në Camp Nou. Dje, mediat iberike raportuan se Neymar do të rikthehet në verë, pasi braziliani do të bëjë të pamundurën që të mos qëndrojë më te PSG.
Ky lajm, tronditi jo pak vendin e Antoine Griezmann dhe vetëm 24 orë më vonë, “Sport” raporton se katalanasit e kanë nxjerrë në shitje kampionin e botës. Barcelona është gati të pranojë një ofertë 100 milion euro.
Interesim ka nga Manchester United dhe PSG, me Griezmann që duket se do të largohet pas vetëm një viti si blaugranas. Në futboll, gjërat lëvizin me shpejtësinë e erës…/abcnews.al
Barcelona have put Antoine Griezmann up for sale after just one season, claim Sport 😳
The report says they could accept a fee of €100 million, with Man United and PSG mentioned as potential suitors 🤑 pic.twitter.com/8nCVYvr3NT
— Goal (@goal) March 22, 2020
Vladimir Prenga12:22 | 28/03/2020
Aleksander Ceferin, presidenti i UEFA-s, ka folur së fundmi për “La Repubblica”dhe normalisht një temë e rëndësishme ishte ajo ë fillimit të kampionateve në Europë dhe merkato. “Nëse klubet nisin të luajnë, edhe ne mund t’i mbarojmë kupat e Europës.
Pastaj, për vitin e ardhshëm mund të rregullohet numri i ndeshjeve në funksion të kampionatit Europian”, shprehet fillimisht Ceferin, i cili më pas flet edhe për transferimet e lojtarëve dhe lë të kuptohet se po mendohet që futbollistët, të cilëve kontrata u mbaron këtë verë, të qëndrojnë deri në janar në ekipet aktuale.
“Nëse sezoni nis përsëri, do të ishte i nevojshëm një kompromis. Tregu duhet të jetë i përshtatshëm. Ju nuk mund t’i thoni një lojtari të luajë deri në fund të gushtit dhe pastaj ai nuk mund të ndryshojë skuadër sepse merkato është mbyllur”, mbyll presidenti i UEFA-s, Aleksander Ceferin. /abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
