Egnatia u mposht nga Tirana kryesuese me shifrat 2-0, në një sfidë që në stolin e rrogozhinasve debutoi si trajner i përkohshëm, Përparim Daiu.
Pas ndeshjes për “Supersport”, Daiu u shpreh se sot humbja erdhi për shkak të gabimeve të vetë skuadrës.
Gjithashtu ai tregoi edhe për situatën tek Egnatia pas shkarkimit të trajnerit Gugash Magani, dhe nëse do ishte i gatshëm të drejtonte skuadrën e Egnatias.
“Isha mjaft i qetë, por na mungon sinqerisht fusha e sportit. Fatkeqësisht sot nuk shkoi kënaqësia deri në fund, sepse e humbëm ndeshjen. Cilësitë e Tiranës dihen, por patëm shumë mungesa, një ekip si Egnatia e vuan mungesën e sulmuesit kryesor. Të djeg më shumë të humbësh nga gabimet tona.
Tirana mund të dominojë me lojë, por do merrte rrjedhë tjetër loja nëse nuk do gabonim te golat. Pengu i vetëm është që nuk morëm rezultatin, por Tirana ka një ekip solid, që sulmon dhe ka cilësi.
Magani? Është kompetenca e presidentit, ai i merr vendimet. Kanë qenë probleme të akumuluara, për arsye rezultatesh dhe të tjera që i di më mirë presidenti. Kjo është puna e trajnerit, ai matet me rezultate. Të gjithë emrat që kanë dalë në media nuk janë kontaktuar. Presidenti ka idetë e veta dhe ka marrë kohë për të vendosur.
A do e marr unë zyrtarisht drejtimin e ekipit? Afrimi tek Egnatia nuk ka qenë që unë të bëja trajnerin. Gashi (Magani) ka qenë miku im dhe si këshilltar i presidentit do e këshilloja të mos u nxitonte, por presidenti i di më mirë gjërat e brendshme. Zgjedhja e tij nuk duhet diskutuar, ai ka investuar dhe e di më mirë se çfarë bën.
Shanset nuk ia jap vetës time, është vendimmarrja e presidentit. Nuk ishte kjo strategjia sot për t’u mbrojtur, ishin episodet dhe gabimet që u ndëshkuam. Kishim një kundërshtar mjaft të fortë, duhet cilësi të jesh i barabartë, por kemi pasur shumë mungesa të rëndësishme, nga portieri te Pedro”, përfundoi Daiu. /f.a/abcnews.al
