Loading ...
Lufta në Iran ka hequr vëmendjen nga ngjarje të tjera ku ushtria amerikane është e përfshirë, kryesisht sulmet ndaj anijeve të vogla në Paqësor, që dyshohen për transportin e drogës.
Sulmi më I fundit vrau një person dhe la dy të mbijetuar. Videoja e postuar në mediat sociale nga Komanda Jugore e Shteteve të Bashkuara tregon një anije që kalon me shpejtësi nëpër ujë para se të shpërthejë në flakë.
Fushata e administratës Trump për të hedhur në erë anijet e dyshuara për trafik droge në ujërat e Amerikës Latine, duke përfshirë Paqësorin lindor dhe Detin e Karaibeve, ka vazhduar që nga fillimi i shtatorit dhe ka vrarë të paktën 194 persona në total. Ushtria nuk ka ofruar prova se ndonjë nga anijet mbante drogë.
Mbikëqyrësi i Pentagonit tha javën e kaluar se do të vlerësojë nëse ushtria amerikane ndoqi një kornizë objektivash kur kreu sulmet ndaj anijeve të dyshuara për kontrabandë droge. Kjo kornizë përfshin gjashtë faza, ndër to përcaktimin e një qëllimi ushtarak, zhvillimin e synimeve, analizën, vendimin, ekzekutimin dhe vlerësimin.
Zyra e inspektorit të përgjithshëm të Pentagonit megjithatë nuk do të hetojë ligjshmërinë e sulmeve, të cilat kanë tërhequr vëmendje nga disa ligjvënës demokratë dhe studiues të së drejtës ushtarake.
Administrata Trump thotë se Shtetet e Bashkuara janë në luftë kundër karteleve të drogës në Amerikën Latine, të cilat sipas saj janë përgjegjëse për plagën e mbidozave fatale që prekin shumë komunitete amerikane.
/abcnews.al/
