Loading ...Vetëm pak orë nga përfundimi i afatit për kandidaturën për kryetar të PD, Ervin Salianji nga Londra paralajmëron se të enjten do të depozitojë në selinë blu dokumentacionin për t’u përballur me Sali Berishën.
“Ironi e fortë: në ditën kur shpallet uzurpimi dhe shkallmimi i rregullave demokratike, ndodhem aty ku lindi Magna Carta, në tempullin e demokracisë.
Pavarësisht farsës, nesër depozitoj kërkesën për të kandiduar për kryetar të Partisë Demokratike të Shqipërisë”
Me synime të qarta për kandidaturën e tij, Salianji thotë se do të lërë pas të shkuarën e Sali Berishës dhe për t’i hapur dyert të ardhmes së PD.
“Modeli i demokracisë perëndimore më frymëzon dhe nuk do të ndalem në luftën për të lënë pas të shkuarën e për ta demokratizuar Partinë Demokratike.”
Kandidimi i Salianjit megjithatë nuk mbetet surprizë. Atë e kishte paralajmëruar. Ashtu si Evi Kokalari, e cila gjithashtu nga SHBA njofton se do të dërgojë nesër dokumentet për të kandiduar përballë Berishës.
Udhëzimi i PD ka bërë të qarta kriteret: duhet fillimisht të jesh anëtar i PD dhe të kesh pastërti të figurës. Pyetja është, me Salianjin e vetëpërjashtuar dhe me njollën e dënimit me burg për kallëzim të rremë, për hir të vetë PD-së, a do të lejohet të kandidojë përballë Berishës?/abcnews.al
