Ministri i Jashtëm i Ukrainës: Vendi është i përgatitur për të gjithë skenarët

schedule15:41 - 19 Shkurt, 2022

schedule 15:41 - 19 Shkurt, 2022

Ukraina është e përgatitur për të gjithë skenarët, tha në një deklaratë ministri i Jashtëm ukrainas.

“Ne po përgatitemi për çdo skenar të mundshëm,” tha Dmytro Kuleba në Konferencën e Sigurisë në Mynih. Sipas Kuleba, pas takimit që ai pati me homologun e tij amerikan Anthony Blinken në Konferencën e Sigurisë në Mynih, Ukraina dhe Shtetet e Bashkuara do të bëjnë çdo përpjekje diplomatike për të mbrojtur Ukrainën.

“I jam mirënjohës ministrit Blinken për të dhënat dhe vlerësimet që na dha për planet agresive të Rusisë. Ukraina sot është edhe më e përgatitur për çdo skenar të mundshëm. Diplomacia ukrainase dhe amerikane do të bëjnë çdo përpjekje për të mbrojtur Ukrainën.

“Shtetet e Bashkuara janë në anën e Ukrainës”, shkroi Kuleba në Twitter.

Kuleba pritet të vizitojë Brukselin dhe Shtetet e Bashkuara javën e ardhshme për të parandaluar një sulm rus.  Ukraina ka akuzuar Rusinë se kërkon të përshkallëzojë tensionet duke mos marrë pjesë në bisedimet e planifikuara trepalëshe të paqes në Ukrainën lindore, duke shtuar se ajo ishte e shqetësuar për përkeqësimin e situatës së sigurisë në zonën e luftës.

“Ne besojmë se abstenimi i Rusisë tregon një qëllim të qartë për të vazhduar përshkallëzimin e situatës”, thuhet në një deklaratë të lëshuar nga delegacioni ukrainas në Konferencën e Sigurisë në Mynih.

Fuqitë perëndimore kanë paralajmëruar se Rusia mund të përgatitet për një ofensivë në shkallë të gjerë në Ukrainë me më shumë se 100,000 trupa që janë vendosur tashmë në kufirin e saj, një pretendim i mohuar nga Moska.

/abcnews.al