Loading ...
Tradita e do që të ketë një të tillë. Në Kupën e Botës u ndanë shumë çmime individuale, veçse njëri ka mbetur ende pezull, dhe pret të votohet nga publiku. Po flasim për golin më të bukur të turneut, një zgjedhje jo edhe aq e lehtë, në një kampionat ku u shënuan plot 308 rrjeta, shpesh tepër të veçanta.
Tashmë, janë përzgjedhur 12 që cilësohen si më të denjët për këtë konkurrim.
Një nga golat më të vlerësuar ishte ai i shënuar nga Sindi Lopez Kabral për Kepin e Gjelbër ndaj Argjentinës, në sfidën e raundit të dytë që nënkampionët e botës e fituan me shumë vuajtje 3-2.
Nuk mund të mbetej pas autori i realizimit që përcaktoi finalen, pra Ferran Torres i Spanjës, që tundi rrjetën argjentinase në minutën e 106-të në stadiumin e Nju Xhersit. Në garë është padyshim aksioni i shkëlqyer individual I Xhud Belinghamit, në finalen e vogël, kur ylli anglez sigloi fitoren e “Tre luanëve” ndaj Francës me shifrat 6-4, pikërisht në sekondat e fundit.
Argjentina i ka përfaqësuesit e saj në garën për këtë trofe. Hulian Alvarez nuk mund të lihej jashtë ndërsa shënoi në mënyrë të shkëlqyer kundër Zvicrës duke I dhënë praktikisht fitoren Argjentinës në duelin çerekfinal dhe tepër të tensionuar.
Një nga golat e Kilian Mbapesë po ashtu është vendosur në grupin e më të mirëve. Pikërisht ai shënuar në ndeshjen e parë të Botërorit për “gjelat”, 3-1 ndaj Senegalit. Fituesi i Këpucës së Artë me 10 goditje të sakta në rrjetë i ka letrat plotësisht në rregull për të marrë edhe një tjetër çmim individual.
Edhe “Madhëria e tij”, Lionel Mesi, do të konkurrojë për këtë tip goli “Pushkash”. Nga tetë golat e tij u përzgjodh ai që realizoi kundër Algjerisë në një nga ndeshjet e grupit./abcnews.al
