Forcat izraelite qëlluan për vdekje dy palestinezë në Bregun Perëndimor, në ditën e varrimit të një gruaje britaniko-izraelite që vdiq në një sulm që vrau edhe dy vajzat e saj.
Dhuna është rritur në rajon gjatë javës së fundit, me muajin e agjërimit mysliman të Ramazanit, Pashkës hebraike dhe Pashkës së krishterë.
“Unë përgëzoj veprimet e ushtarëve që eliminuan dy terroristë që hapën zjarr ndaj tyre pranë Elon Moreh”, një vendbanim hebre pranë qytetit të Nablusit në Bregun Perëndimor, tha në Twitter ministri i Mbrojtjes Yoav Gallant.
Ai shtoi se trupat kishin “parandaluar një sulm ndaj civilëve izraelitë”.
Një zyrtar i lartë palestinez i tha AFP se ai ishte informuar për vdekjen e dy palestinezëve, të cilët nuk u identifikuan menjëherë.
Në një deklaratë, ushtria izraelite tha se “sulmuesit e armatosur qëlluan nga një automjet në postën Elon Moreh”.
“Ushtarët qëlluan në drejtim të automjetit dhe neutralizuan dy sulmues të armatosur”, shtoi ai.
Ushtria tha se kishte sekuestruar dy pushkë M-16 dhe një pistoletë.
Incidenti ndodhi pasi mijëra njerëz u mblodhën të martën në një vendbanim izraelit në Bregun Perëndimor për funeralin e një gruaje britaniko-izraelite të vrarë në një sulm me të shtëna ditë më parë.
“Sulmi i tmerrshëm”
48-vjeçarja, e njohur me emrin e saj hebraik Leah, vdiq të hënën nga plagët e marra tre ditë më parë kur makina e saj u sulmua në Luginën e Jordanit.
Dy nga fëmijët e saj, 16 dhe 20 vjeç, u qëlluan për vdekje në sulm dhe u varrosën të dielën.
Kryeministri i Mbretërisë së Bashkuar, Rishi Sunak, në një deklaratë, i cilësoi vrasjet “të neveritshme” dhe shtoi “MB e dënon këtë sulm të tmerrshëm ndaj civilëve”.
Ai tha se Britania u bëri thirrje “të gjitha palëve të de-përshkallëzojnë tensionet në Izrael dhe territoret e pushtuara palestineze dhe t’i japin fund ciklit vdekjeprurës të dhunës”.
Një rritje e dhunës është shkaktuar që nga një bastisje e policisë izraelite në xhaminë Al-Aksa të Jerusalemit, e ndjekur nga gjuajtja me raketa nga Gaza, Libani dhe Siria, dhe një përplasje me makinë në Tel Aviv që vrau një turist italian.
Të hënën, vajtuesit palestinezë u mblodhën pranë qytetit të Jerikos për funeralin e një djali 15-vjeçar, i cili u qëllua për vdekje nga forcat izraelite gjatë një bastisjeje në Luginën e Jordanit.
Konflikti këtë vit ka marrë jetën e të paktën 96 palestinezëve, 19 izraelitë, një ukrainas dhe një italian, sipas një numërimi të AFP-së bazuar në burime zyrtare izraelite dhe palestineze.
Këto shifra përfshijnë, nga pala palestineze, luftëtarë dhe civilë, duke përfshirë të mitur, dhe në anën izraelite, kryesisht civilë, duke përfshirë të mitur, dhe tre anëtarë të pakicës arabe.
Izraeli e ka pushtuar Bregun Perëndimor që nga Lufta Gjashtë Ditore e vitit 1967. /abcnews.al
