Bojkotoi procesin e votimit, Alibeaj: Ramës i duhej opozita për fasadë, e ardhmja do të na japë të drejtë

schedule19:46 - 4 Qershor, 2022

schedule 19:46 - 4 Qershor, 2022

Edi Ramës i duhej opozita për fasadë. Kështu është shprehur kreu i Grupit Parlamentar të Partisë Demokratike për zgjedhjen e Presidentit të ri të ri të Republikës, pasi ai dhe mbështetësit e tij nuk u bënë pjesë e procesit.

Enkelejd Alibeaj sqaron se Grupi i PD vendosi të mos marrë pjesë në seancën e sotme pasi nuk mund të “shndërrohej në garniturë të pjatës së servirur nga Edi Rama .”

ENKELEJD ALIBEAJ NË FCEBOOK

“Seanca për zgjedhjen e Presidentit të Republikës ishtë farsa e radhës për të cilën opozita i duhej Ramës vetëm për fasadë.
Për shqiptarët e mësuar me lojërat e politikës së vjetër, shfaqja e sotme, që nga propozimi i emrit, procedurat e përshpejtuara dhe përfshirja e non gratave të Parlamentit, dëshmuan dhe njëherë se nuk ka asnjë të re nga fronti i atyre që mbajnë njëri-tjetrin në skenën e politikës.
Grupi parlamentar i PD vendosi të mos marrë pjesë në këtë seancë fasadë votimi, sikundër në mënyrë tejet transparente, përgjatë disa takimeve mediatike ne syt të publikut u tregoi shqiptarëve që nuk bëhet pjesë e bojkotit të institucioneve apo negociatave, kulisave apo pazareve. Por kurrsesi nuk mund të shndërrohej në garniturë të pjatës së servirur nga Edi Rama.
Shqipëria kishte nevojë jo vetëm për një President të të gjithëve, por mbi të gjitha për një proces gjithëpërfshirës, transparent e real, i cili t’i jepte atij besimin e të gjithë shqiptarëve. Produkti i këtij procesi do mund të shihej kështu si bartës i unitetit të popullit, si njeriu mbi palët, si zbutës e moderator i klimës politike dhe si rregullator i ngërceve insititucionale.
Presidenti i Republikës forcën e vet e merr nga besimi dhe legjitimiteti që populli i jep. Ishte ky detyrimi që secila palë politike, e cila pretendon të përfaqësoje sinqerisht shqiptarët, duhej të angazhohej e të përmbushte kështu detyrimin e saj kushtetues, politik dhe institucional. Këtë besuam e besojmë, dhe kësaj i shërbyem. E sotmja po, por edhe e ardhmja do na gjykojë e japë të drejtë!” 
Kujtojmë se Alibeaj e ka bërë të ditur se grupi i PD nuk do të ishte prezent në sallën e Parlamentit kur të mbahej raundi i katërt për zgjedhjen e presidentit. Ai deklaroi se ky nuk do të ishte një bojkot pasi PD u bë pjesë e proceseve të negociatave, edhe pse si përfundim nuk u arrit gjuha e përbashkët. /abcnews.al/