Teatri Kombëtar ka rikthyer debatet në Këshillin Bashkiak të Tiranës. Këshilltarët e opozitës kërkuan miratimin e një peticioni drejtuar Parlamentit për t’i rikthyer të drejtën që të vendosin rreth tjetërsimit të truallit ku ndodhet godina e teatrit.
Kërkesa u refuza. Opozita braktisi mbledhjen. Ndërsa kryetari i bashkisë, Erion Veliaj, nuk e kurseu ironinë në përgjigje të akuzave të demokrateve dhe Lëvizjes Socialiste për Integrim.
Para largimit nga mbledhja demokratët ngritën dyshme edhe mbi kontratën koncesionare për ndërtimin e terminalit për transportin publik në Kamëz, por sipas kryebashkiakut Veliaj projekti i miratuar nga qeveria Berisha është modifikuar vetëm në pjesën ku parashikoheshin ndërtime.
Sa i përket vendimit që detyron fëmijët nga mosha 0 deri në 6 vjeç të paguajnë biletë për të udhëtuar me linjat urbane në Tiranë, kryetari i bashkisë deklaroi se është nënshkruar nga kryetari i Partisë Demokratike Lulzim Basha kur mbante detyrën e ministrit të Transporteve.
Sipas Veliajt, adiministrata aktuale e bashkisë i ka kërkuar kompanive të transportit urban që fëmijët e kësaj moshe të udhëtojnë falas./abcnews.al
