Portieri i Chelsea, Edouard Mendy, po rezulton një blerje e goditur nga blutë e Londrës. Gardiani nga Senegali ka mahnitur Premier League me paraqitjet e tij dhe tashmë ai është një armë e fortë në formacionin e Frank Lampard.I këtij mendimi është edhe Manuel Neuer, i cili e vlerëson së tepërmi 28-vjeçari.
“Në ditët e sotme ka shumë portierë të klasit botëror. Për shembull, Edouard Mendy, i cili u transferua nga Rennes te Chelsea. Ai është një lojtar i cili luante në Ligue 1, por sapo kaloi në një klub të madh e vërtetoi se është sërish i suksesshëm”, deklaron gjermani në një prononcim për “L’Equipe”.
Kujtojmë që Mendy u transferua gjatë merkatos së verës në “Stamford Bridge” dhe që nga ajo kohë ai ka zënë vendin e Kepa Arrizabalagës. Portieri ka luajtur në shtatë ndeshje në Premier League, ku në pesë prej tyre e ka mbajtur portën të paprekur. /abcnews.al
