Presidenti amerikan, Donald Trump, pasi konfirmoi takimin me homologun rus Putin, u shpreh për gazetarët se një nga temat e bisedimeve do të jenë dhe ndërhyrjet ruse në zgjedhjet presidenciale amerikane.
Kreu i Shtëpisë së Bardhë, Trump, konfirmoi për gazetarët në bordin e avionit presidencial Air Force One, se shumë shpejt do të takohet me presidentin rus Putin. Ndër të tjera ai tha se mes temave të bisedimeve në takimin e 16 Korrikut në Helsinki, do të jenë Ukraina, Siria dhe Krimea.
Pyetjes së gazetarëve për mundësinë e heqjes së sanksioneve të vendosura ndaj Rusisë, Trump iu përgjigj në mënyrë jo të qartë, duke mos dhënë asnjë detaj. Ai theksoi se është në pritje se çfarë do të bëjë Rusia. Kreu i Shtëpisë së Bardhë tha se do të fliste me Putin për Sirinë dhe Ukrainën si dhe për disa gjëra që paraardhësi i tij Obama i ka humbur si për shembull Krimea.
Pyetjes nëse Shtetet e Bashkuara të Amerikës mund të njohin në të ardhmen Krimenë si pjesë e Rusisë, Trump iu përgjigj se është një gjë që do të shihet me kohën./abcnews.al
