Asnjë i infektuar te Tirana. Bardheblutë u stërvitën edhe sot, ndërkohë që më pas udhëtuan drejt Gjirokastrës, ku nesër përballen me Luftëtarin prej orës 17:00. Veç njoftimit se të gjithë kanë dalë negativë në testet për Covid-19, klubi bardheblu ka njoftuar se kanë marrë “OK”-in për të luajtur takimin e radhës.
“Stafi dhe skuadra kanë kryer sot paradite testet për Covid-19 në ambjentet e stadiumit “Selman Stërmasi”. Fatmirësisht asnjë futbollist dhe pjestar i stafit bardheblu nuk ka rezultuar pozitiv me Covid-19 dhe gëzon shëndet të plotë.
Skuadra ka marrë konfirmim zyrtar nga Ministria e Shëndetësisë dhe e Mbrojtjes Sociale dhe udhëtuar sot drejt Gjirokastrës për ndeshjen e nesërme ndaj Luftëtarit.
Grupi është i mobilizuar dhe i përqëndruar maksimalisht tek sfida për të marrë maksimumin në finalen e radhës drejt synimit madhor!”, shkruhet në njoftimin e Tiranës. / abcnews.al
