superiore

Rama-Kallaku.jpg
Veronik Istrefaj20:37 | 01/04/2020

Talenti i Teutës, Sherif Kallaku, nuk është përmbajtur aspak në adresën e tij zyrtare në Instagram, duke i dalë kundër kryeministrit të Shqipërisë, Edi Rama, i cili më herët kishte deklaruar se nuk do të ketë asnjë ndihmë për sportin në Shqipëri.

“Dëgjuam sot Kryeministrin, e tha prerë, madje me arrogancë: “Asnjë ndihmë për futbollin shqiptar”. S’ka asgjë për t’u habitur. Kryeministri ynë ka kohë që nuk reagon aty ku duhet, aty ku ka nevojë, por vetëm aty ku mund të fitojë duartrokitje ndërkombëtare.

Ka kohë që nuk i hyjnë në sy duartrokitjet e shqiptarëve. Ndaj, maksimumi që mund të bëjë, është të çojë edhe dy infermiere shtesë: Një për mamin e Buffon e një për të Ronaldos!”, shkroi Kallaku./abcnews.al

 

Laska-Laci.jpg
Veronik Istrefaj16:44 | 01/04/2020

Presidenti i Laçit, Pashk Laska, ka dhënë një intervistë për Fan Zone në Supersport. Me anë të një bisede telefonike, kreu i klubit kurbinas pranoi se futbolli po shkon drejt një kolapsi ekonomik dhe nuk po sheh dritë jeshile as nga Qeveria, as nga Federata Shqiptare e Futbollit.

“Nuk ka shumë rëndësi kjo pjesë, rëndësi ka kush do t’i paguajë futbollistët dhe kush do t’iu japë për të ngrënë. Unë iu kam komunikuar futbollistëve që me datë 11, klubi nuk merr përsipër asnjë lloj pagese. Unë e kam biznes privat dhe nuk mund të paguaj dikë që nuk punon.

Kryeministri? Unë jam i mendimit që ne të deklarojmë atë që paguajmë. Flas në emër të klubit tim. Klubi im funksionon në mënyrë të drejtë dhe paguan lojtarët, deklaron çdo pagë. Paguan rrogat, fjetjen, dietat. Me një dietë sa një punëtor i thjeshtë, nuk e besoj. Unë do iu drejtohem të gjithëve, shtetit, FSHF-së. Deri tani, nuk shoh asnjë dritë jeshile.

As te Federata, as te shteti, mendoj se jemi para një kolapsi. Faleminderit”, përfundoi fjalën e tij presidenti i Laçit./abcnews.al

ignjatovic.jpg
Vladimir Prenga17:12 | 31/03/2020

“Deri më tani mund të them vetëm gjëra pozitive për Shqipërinë”. Kështu e nis intervistën Aleksandar Ignjatovic, qendërmbrojtësi që këtë verë pranoi të provonte një eksperiencë të re në Superiore dhe e bindi Laçi. Përshtypjet e tij për vendin tonë dhe kampionatin janë pozitive. “Kampionati është cilësor dhe ka shumë lojtarë të mirë, veçanërisht lojtarë të rinj. Tirana është një qytet i këndshëm, ka shumë restorante dhe kafe. Edhe ushqimi është shumë i mirë këtu”, shton shtatlarti, i cili rrëfimin e tij për Abcnews.al nuk e lë më kaq.

 

Debutimi i Ignjatovic, në Europa League kundër Hapoel Beer Sheva

Si erdhi në Shqipëri? Ignjatovic tregon se i kishin folur mirë për kampionatin dhe për klubin e Laçit. “Para se të vija këtu fola më disa miq të mi që kanë luajtur më parë në Shqipëri. Bisedova me Milan Culum dhe Renato Gojkovic, të cilët kanë luajtur me Partizanin më parë. Ata më thanë gjëra të mira për Laçin. Klubi është korrekt dhe profesionist. Deri më tani kam një raport shumë të mirë me të gjithë njerëzit në klub, veçanërisht me presidentin Laska, i cili kontrollon gjithçka këtu”, rrëfen qendërmbrojtësi.

Ka diçka që Aleksandar e ka vënë re në kampionatin shqiptar: “Kam luajtur në Serbi, Bosnje-Hercegovinë, Holandë dhe Hungari. Ndryshimi me futbollin boshnjak qëndron në faktin që atje është futboll më fizik. Këtu lojtarët përpiqen të luajnë futboll më shumë, futbollistët janë më të shpejtë dhe këtu është luftë nga minuta e parë. Ndonjëherë ekipet nuk mendojnë nëse humbin ose fitojnë. Më e rëndësishme është që të luftohet në fushë”.

Aleksandar, kur prezantohej te Feyenoord

Radicki Nis është klubi ku Ignjatovic e nisi karrierën, për ta kaluar më pas te Borac Cacak. Në vitin 2009 u transferua në Holandë, te gjigantët e Feyenoord. Çfarë nuk shkoi? Mbrojtësi nuk dëshiron ta kthejë kokën pas: “Feyenoord është histori e gjatë. Kisha disa probleme me agjentin dhe tarifën e transferimit, ndaj nuk ishte problem dokumentacioni”.

Ai i rikthehet Superiores dhe nuk stepet ta thotë që Tirana është ekipi më i mirë, ndërsa kur pyetet për sulmuesin më të mirë, duke veçuar Nwabueze, ai nuk mund të zgjedhë një emër. “Ekipi më i mirë deri më tani është Tirana. E kanë treguar në fushë diçka të tillë. Sa i takon sulmuesit më të mirë, nuk mund të them kush është më i miri. Ka shumë sulmues të mirë, që janë në të njëjtin nivel. Për mua, repartin më të mirë sulmues e ka Kukësi. Janë tre lojtarë, jo të fortë fizikisht, por të zgjuar”.

Aleksandar, në një baret e Tiranës

Ka diçka që i ka bërë përshtypje te Laçi, madje Aleksandar Ignjatovic thekson se nuk e ka parë në asnjë ekip diçka të tillë. “Kurrë në jetën time nuk kam parë ekip ku të gjithë lojtarët të jenë njerëz pozitivë. Ne kemi ekip të ri, me djem që punojnë shumë. Të gjithë janë të fokusuar vetëm te futbolli. Shpresoj shumë që disa prej tyre të bëjnë një karrierë të mirë në këtë sport”, shprehet mbrojtësi, i cili në prill feston 32-vjetorin e lindjes.

Ignjatovic flet edhe për raportin me presidentin Laska, si dhe komenton edhe vlerësimin që i është bërë, duke i dorëzuar shiritin e kapitenit para ndeshjes me Flamurtarin. “Presidenti është një njeri që është shumë i pasionuar pas futbollit. Kemi pasur një komunikim shumë të mirë deri tani dhe shpresoj të vazhdojë kështu”.

 

Ignjatovic, në fillim të ndeshjes me Tiranën

“Shiriti? Trajneri dhe presidenti e morën vendimin për të më dhënë shiritin e kapitenit. Jam i nderuar për diçka të tillë, por është gjithashtu një përgjegjësi e madhe. Jam i sigurt që do të përgjigjem mirë ndaj këtij besimi që më kanë dhënë”, shton Ignjatovic, i cili në të shkuarën ka qene pjesë e Serbisë U21. Deri më tani është i kënaqur te Laçi dhe dëshira është të qëndrojë te bardhezinjtë.

“Sa i takon të ardhmes time te Laçi, do të flas me presidentin kur të mbarojë sezoni dhe të shohim se çfarë do të ndodhë. Unë kam edhe një vit kontratë. Nëse ai dëshiron që unë të qëndroj në ekip dhe do të jetë korrekt si deri tani, do të qëndroj këtu. Për momentin shpresoj që të shkojmë në Europë, sikurse sezonin e fundit”, shprehet serbi i kurbinasve, autor i një goli në 25 takime të luajtura në kampionat.

 

Ignjatovic, në bregdetin e Durrësit

Shqipëria i pëlqen, por edhe e vuan mungesën e familjes. “Në përgjithësi Shqipëria është e bukur. Plazhet janë shumë të këndshme, si dhe njerëzit janë të mirë. Më pëlqen Tirana. Ka diell gjithmonë dhe ku është dielli, ka edhe energji pozitive”, shprehet Ignjatovic, i cili më pas flet edhe djalin e tij dhe familjen.“Jeta është e vështirë për mua, veçanërisht kur djali im nuk është me mua. Gjithmonë e sjell në Tiranë dhe qëndron me mua kur e ka pushim në shkollë.

Djali më kupton mua, kjo është puna ime dhe do e bëj edhe për 4-5 vite. Pastaj do të jem gjithë kohën me të. Tani pres për verën, që të përfundojë edhe kjo situatë e krijuar nga Coronavirusi dhe gjithçka të kthehet në normalitet. Familja ime do të vijë këtu dhe gjithë verën do të qëndrojë me mua. Kështu që do pres”, përfundon mbrojtësi i Laçit, Aleksandar Ignjatovic. / Vladimir Prenga – Abcnews.al

 

Aleksandar, me djalin e tij
cungu-me-peqinin.jpg
Vladimir Prenga12:55 | 31/03/2020

Formacioni me lojtarët më të mirë të ët gjithë kohërave, kjo është një nga sfidat e shumta të personazheve të botë sportive. Edhe trajneri i Laçit, Armando Cungu, i është bashkuar ftesës së bërë nga prej zyrtareve të klubit bardhezi.

Shkodrani njihet si një tifoz anglez, por në formacioneve e yjeve ka vend vetëm për Steven Gerard, legjendën e Liverpool. Buffon në portë, Cafu e Roberto Carlos nga krahët, kurse në qendër të prapavijës ka përzgjedhur dyshen e famshme të Milanit, Baresi-Maldini.

Në mesfushë pozicionohen Iniesta e Zidane, kurse Lionel Messi është zgjedhur nga Cungu si sulmues i dytë në mbështetje të Ronaldo fenomenit dhe legjendës Maradona. Tekniku më pas sfidon Roland Peqinin për të zgjedhur ekipin me lojtarët më të mirë.

“I emocionuar nga nominimi i Armando Cungu”, shkruan Peqini, i cili më pas ka renditur formacionin e Kukësit, që ia doli të kalonte tre ture në Europa League, pas sezonit të parë në Superiore. “Besoj këtë formacion e kujtojmë të gjithë me nostalgji”, shton Peqini. /abcnews.al

 

batha-e-torasa-me-cale.jpg
Vladimir Prenga09:20 | 31/03/2020

Nuk ka ditë që Elton Cale të mos jetë protagonist. Herë ngacmon, herë e ngacmojnë. Këtë herë ka qenë shënjestër e shokëve të tij të skuadrës. Fotografi i bardhebluve, Izmir Doda, ka modifikuar një foto të brazilianit, që paraqitet si Hulk.

Cale, në llogarinë e tij, me shaka ankohet për modelin e flokëve, kurse në në “Photosport.al” e ngacmon i zakonshmi Agustin Torassa. Argjentinasi shkruan me shaka: “Elton Cale është Hulku shqiptar”.

Gjithsesi më parë kishte komentuar edhe mesfushori Idriz Batha, i cili i drejtohet me një pyetje brazilianit Cale: “Elton, ti shumë stërvitje, e?”. Anësori i Tiranës ka vendosur të heshtë, për… momentin, dhe nuk u është përgjigjur shokëve të tij. /abcnews.al

 

shkurtaj-1280x853.jpg
Veronik Istrefaj16:17 | 30/03/2020

Sulmuesi i Kukësit, Vasil Shkurtaj, vendosi të shkojë në Spanjë për të kryer terapi, por për fat të keq, Koronavirus u përhap kudo dhe fluturimet u anuluan. Shkurtaj ka mbetur i bllokuar në Spanjë dhe për Fan Zone në Supersport, tha:

“Nuk mund të kthehesha dot, prandaj mora vendimin të vij në Spanjë dhe të bëj këtu terapinë. Po bëj terapi normale, pastaj u bllokuan të gjitha. Preva biletë për tu kthyer, por u anuluan të gjitha fluturimet. Në këto momente, kam ngelur këtu.

Para tri ditësh, kisha dalë për vrap, kisha dalë vonë natën pas orës 11. Më ndaloi policia dhe më falën vetëm se isha i huaj, por nuk më falin më. Mund edhe të më burgosnin.

Rikuperimi? Po përpiqem të bëj më të mirë, duke bërë ushtrime në shtëpi në komunikim me doktorin. Unë duhet të bëj vrap, gjë që është e pamundur. Përpiqem që të bëj ushtrime në shtëpi. Kam folur edhe me presidentin e Kukësit, edhe me lojtarët kam folur thuajse çdo ditë.

Shëndeti është parimor, futbolli shpresoj të rikthehet sa më shpejt. Por shëndeti është kryesori. Diferenca me Tiranën? Ne kemi shumë besim, mund të rikuperojmë pikë. Patjetër që dua të dal edhe golashënues, është një ccmim individual që dua ta fitoj. Por më shumë dua kampionatin me ekipin”, tha Shkurtaj./abcnews.al

 

Shkurtaj në Fan Zone
osmani.jpg
Vladimir Prenga13:33 | 30/03/2020

Krizë në çdo fushë të jetës. Pandemia e shkaktuar nga COVID-19 nuk e ka kursyer as futbollin, teksa është ndalur çdo aktivitet dhe të gjithë po qëndrojnë nëpër shtëpitë e tyre, sikurse edhe qeveria shqiptare ka vendosur.

FSHF, Liga Profesioniste e Futbollit, Sindikata e Futbollistëve Profesionistë Shqiptarë dhe vetë lojtarët i janë drejtuar qeverisë, për t’i përfshirë edhe ata në skemën e kompensimit, pasi po e vuajnë edhe ata krizën e thellë ekonomike.

Tefik Osmani, i kujton kryeministrit Edi Rama vendimin e qeverisë së Kosovës, për të akorduar 5 milionë euro në ndihmë të sportit. Lojtari i Tiranës, në Instagram shkruan: “Edi Rama, ke momentin që të futesh në historinë e futbollit shqiptar. Më dëgjo edhe këtë herë”. /abcnews.al

Postimi i Osmanit
Cordeiro-Partizani-Superiore.png
Vladimir Prenga10:56 | 30/03/2020

Karantina nuk është e lehtë për futbollistët, të cilët mezi presin rikthimin në fushën e blertë. Ende nuk ka datë dhe nuk dihet se kur nisën kampionatin tonë, por ka nga ata që po mundohen të ruajnë formën fizike gjatë kësaj periudhe.

Një ndër ta është edhe mesfushori i Partizanit, William Cordeiro. Braziliani, veç stërvitjes në shtëpi, del për vrap edhe jashtë. Ai ka postuar një video, ku shfaqet duke vrapuar në rrugët e lagjes së tij. /abcnews.al

 

Laci-Xhixha.jpg
Veronik Istrefaj20:58 | 29/03/2020

Klubi i Laçit ka bërë një njoftim në faqen zyrtare në Instagram, ku i ka kërkuar Qeverisë të hedhë sytë nga futbolli dhe të ndihmojë klubet shqiptare, pasi me këtë krizë ekonomike të shkaktuar nga Koronavirus, e kanë të pamundur të likuidojnë futbollistët e tyre, me dieta dhe me shpenzimet tjera. Më poshtë, dhe njoftimi i klubit kurbinas:

“Ditë të vështira për të gjithë shqiptarët dhe për gjithë globin duhet thënë. Askush nuk e kishte imagjinuar një situatë të tillë, por ky është realiteti tani. Gjithsesi të gjithë duhet të bëjmë forcat bashkë dhe ta kapërcejmë këtë sprovë.

Sigurisht pasojat janë të rënda dhe kanë nisur të ndjehen që tani. Po i ndjen edhe bota e sportit dhe ajo e futbollit në veçanti. Nuk mbeten jashtë kësaj krize as klubet shqiptare dhe as klubi ynë . Në kushtet kur çdo aktivitet është ndalur, edhe për klubet e futbollit është e vështirë që të likuidojnë detyrimet financiare mujore, sigurimet shoqërore , tatimin në burim dhe tatimin mbi fitimin , që janë jo të pakta në vlera.

Futbollistët, stafi dhe pjesëtarët e tjerë të klubit me të drejtë presin të paguhen. Ka njëfarë mirëkuptimi të gjithanshëm për situatën e vështirë, por në fund të gjithë mendojnë se çfarë do të shtrojnë në tryezë, si do të paguajnë qiratë, apo si do të shlyejnë detyrimet e tjera.

Në këto kushte kur çdo restorant është i mbyllur, e vetmja formë qe po i mundësojmë sportisteve tanë trajtimin ushqimor është shërbimi katering, pasi jemi të detyruar tu shërbejmë dietën ditore ushqimore sipas rregullave te përcaktuara në kontratë.

Nëse ne si klube nuk u përgjigjemi dot, praktikisht kemi pushuar së funksionuari. Ndaj, shteti shqiptar do të duhet ta shikojë me seriozitet edhe situatën e klubeve të futbollit, sikurse të çdo biznesi tjetër.

Kjo nuk është në të mirë të askujt, ndaj presim një reagim të qeverisë shqiptare për këtë situatë. Nuk kërkojmë as me shumë e as më pak, por të jepet ndihmë, siç ndodh kudo nëy Europë, duke nisur nga Kosova fqinje, qe jo me gjate se dy dite miratoi fondin prej 5 milion eurosh për sportin”./abcnews.al

Ngoo-Postimi.jpg
Veronik Istrefaj20:38 | 29/03/2020

Sulmuesi i Tiranës, Michael Ngoo, vazhdon të jetë aktiv në rrjetet sociale. Postimet e tij në InstaStory janë të shumta dhe ndonjëherë, duhen minuta të tëra për t’i parë të gjitha.

Por sot, në sy bie një postim ndryshe i sulmuesit britanik. Bomberi bardheblu, me shaka… ndoshta jo, ka zbuluar një prapaskenë në shtëpinë e tij, aty ku është i izoluar aktualisht.

“Karantina nuk po funksionon siç duhet. Gruaja ime dhe unë, po bëhemi miq të ngushtë. Për pak desh i tregova për të dashurën time”, shkroi Ngoo./abcnews.al

 

Postimi i Ngoo


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono