Fundjava rikthen Superioren dhe Kategorinë e Parë. Skena e madhe është “Air Albania Stadium”, ku në fushë do të zbresin Tirana dhe Skënderbeu. Bardheblutë do tentojnë të marrin fitoren e tetë radhazi në kampionat dhe të vënë në presion Kukësin, që nesër ka një transfertë të vështirë në Ballsh.
Korçarët nuk zbarkojnë në kryeqytet të dorëzuar. Dihet që Skënderbeu ka një grup të mirë futbollistësh dhe mund të përballet haptazi me këdo. Në kryeqytet e vlerësojnë kundërshtarin e radhës, por në krahun tjetër e kanë të qartë që vetëm fitorja u bën punë.
E PARA – Kastrioti kryesues i grupit A e ka detyrim rikthimin te fitorja pas barazimit në Burrel. Krutanët përballen me Dinamon, që po lufton për të qëndruar në kategori. Egnatia dhe Tërbuni, që një javë më parë parë u rikthyen tek fitoret, përballen mes tyre. Në grupin A për sot është programuar të luhet edhe sfida Korabi-Erzeni, që pritet të jetë mjaft interesante.
Grupi B përballjet “big” i ka të dielën, kurse sot luhet derbi mes Elbasanit dhe Turbinës dhe për të disatin vit për mbijetesën. Oriku-Iliria është një prej takimeve të kësaj jave, ndërkohë që luhet edhe Devolli-Shënkolli, në Bilisht. / abcnews.al
