Loading ...
KF Vllaznia ka zyrtarizuar Csaba László si trajnerin e ri të skuadrës. Tekniku 62-vjeçar hungarez merr drejtimin e kuqebluve pas përfundimit të bashkëpunimit me Edi Martinin.
László vjen në Shkodër me një karrierë të gjatë ndërkombëtare, e cila përfshin eksperienca në Gjermani, Hungari, Ugandë, Skoci, Belgjikë, Lituani, Sllovaki, Indi dhe Rumani. Në Gjermani ai ka punuar edhe në strukturat e Borussia Mönchengladbach, ndërsa më pas ishte pjesë e stafit të Kombëtares së Hungarisë si ndihmës i Lothar Matthäus.
Një nga periudhat më të spikatura të karrierës së tij ishte te Hearts në Skoci. Në sezonin 2008–2009, skuadra përfundoi e treta në kampionat dhe László u shpall Trajneri i Vitit në Skoci, si nga Scottish Premier League ashtu edhe nga Scottish Football Writers’ Association.
Edhe në Hungari ai kishte marrë më herët një vlerësim të rëndësishëm. Në vitin 2005 u shpall Trajneri Hungarez i Vitit, pasi drejtoi Ferencvárosin drejt fazës së grupeve të UEFA Cup.
Në nivel kombëtaresh, László ka drejtuar Ugandën dhe Lituaninë. Me Ugandën mori drejtimin në vitin 2006, ndërsa në vitin 2012 u emërua trajner i Lituanisë.
Në nivel klubesh, emri i tij lidhet gjithashtu me Ferencváros, FC Sopron, Hearts, Charleroi, MTK Budapest, Dundee United, DAC Dunajská Streda, Chennaiyin FC dhe Sepsi OSK, ndërsa eksperienca e fundit e regjistruar para Vllaznisë ishte te Sepsi OSK në Rumani gjatë vitit 2025. László ka punuar edhe më parë në Skoci, ku në vitin 2017 mori drejtimin e Dundee United.
Tashmë ai rikthehet në futbollin europian me një sfidë të re, këtë herë në krye të Vllaznisë së Shkodrës. Klubi e përshkruan emërimin me tre fjalë: “Eksperiencë. Personalitet. Ambicie.”
