Loading ...
Presidenti i Shteteve të Bashkuara, Donald Trump deklaroi se Uashingtoni dhe Teherani janë pranë arritjes së një marrëveshjeje fillestare që synon t’i japë fund konfliktit mes dy vendeve, duke bërë të ditur se kishte anuluar sulmet ajrore të planifikuara ndaj Iranit.
“Sapo arritëm një zgjidhje të shkëlqyer për luftën me Iranin”, u tha Trump gazetarëve në Zyrën Ovale të enjten, duke shtuar se marrëveshja do të garantonte që Irani të mos zotërojë kurrë armë bërthamore.
“Ne kemi një marrëveshje që Irani nuk do të ketë kurrë një armë bërthamore, që ishte edhe qëllimi kryesor i gjithë kësaj përpjekjeje. Është një zhvillim shumë i rëndësishëm”, deklaroi ai.
Megjithatë, Teherani ka reaguar me kujdes ndaj këtyre pretendimeve. Zëdhënësi i Ministrisë së Jashtme iraniane, Esmail Baghaei i cilësoi raportimet për një marrëveshje si “spekulative”, duke theksuar se “asgjë nuk është finalizuar”.
Deklaratat e Trump vijnë në një kohë kur tensionet mes SHBA-së dhe Iranit mbeten të larta. Disa orë para njoftimit, presidenti amerikan kishte paralajmëruar se do ta godiste Iranin “shumë fort”, ndërsa më herët kishte bërë deklarata të ngjashme se një marrëveshje ishte afër.
Konflikti u përshkallëzua pas sulmeve të gjera të nisura nga SHBA-ja dhe Izraeli kundër Iranit më 28 shkurt. Teherani u kundërpërgjigj me sulme ndaj Izraelit dhe aleatëve amerikanë në Gjirin Persik, si dhe me masa që ndikuan në qarkullimin përmes Ngushticës së Hormuzit, një nga rrugët më të rëndësishme për transportin global të naftës dhe gazit natyror të lëngshëm.
/abcnews.al/
