Loading ...Çfarë do të thotë të shohësh botën kur nuk mund ta shohësh me sy? Përgjigjen e sjell libri prekës “Djali që e sheh botën me gishta”, një vepër e shkrimtarit dhe historianit polak Tomasz Małkowski, që rrëfen me ndjeshmëri aventurat e një djali të vogël të quajtur Kamil.
I ftuar në studion e ABC-së së Mëngjesit, autori ndau historinë e një personazhi që nuk kërkon mëshirë, por mirëkuptim. Kamili është vetëm 5 vjeç dhe ka lindur i verbër. Megjithatë, ai nuk e sheh këtë si pengesë për të jetuar jetën si çdo fëmijë tjetër.
Në 20 tregime të shkurtra, lexuesi njihet me përditshmërinë e Kamilit, motrës së tij Suzana, prindërve dhe gjyshërve, përmes situatave të thjeshta, por thellësisht domethënëse. Suzana ka flokë ngjyrë gështenje, por Kamili nuk e di se çfarë ngjyre kanë gështenjat. Ai e njeh botën ndryshe, përmes prekjes, tingujve, aromave dhe emocioneve.
Dhe pikërisht këtu qëndron forca e librit: të tregojë se diversiteti nuk është kufizim, por një mënyrë tjetër për të përjetuar jetën.
“Kamili është një djalë si gjithë të tjerët”, shprehet autori. Ai gabon, mërzitet, sfidohet dhe mëson, ashtu si çdo fëmijë. Nuk është idealizuar dhe as paraqitur me patetizëm. Përkundrazi, Tomasz Małkowski zgjedh ta rrëfejë historinë me ngrohtësi dhe sinqeritet, pa zbukurime.
Në libër ka edhe momente të vështira, kur mungesa e empatisë nga të tjerët e lëndon Kamilin. Si rasti i një vizitori në kopshtin zoologjik që e pyet me ironi nëse kishte ardhur “t’i nuhaste kafshët”, apo të afërm që e trajtojnë si të paaftë për të bërë gjëra që ai në fakt i bën vetë.
Por mesazhi i autorit është i qartë: njerëzit me aftësi ndryshe nuk kanë nevojë për keqardhje, kanë nevojë për pranim.
“Unë nuk dua që lexuesi ta mëshirojë Kamilin, sepse as vetë Kamili nuk e pëlqen këtë”, thotë Małkowski. Atij i mjafton empatia, diçka që shpesh u mungon jo vetëm fëmijëve, por edhe të rriturve.
Tomasz Małkowski, i lindur në Gdansk të Polonisë, është pedagog special, historian dhe autor i njohur i librave për fëmijë e teksteve shkollore të historisë. Përmes këtij libri, ai nuk rrëfen vetëm historinë e një djali të vogël, por i kujton shoqërisë sonë një të vërtetë të madhe:
Ndonjëherë, për ta kuptuar botën më mirë, duhet ta shohim jo vetëm me sy… por edhe me zemër.
