Izraeli dhe SHBA sulm në Teheran/ Çfarë përgjigjeje mund të japë Irani?

Irani mund të mos jetë një superfuqi ushtarake si Shtetet e Bashkuara të Amerikës, por zotëron një arsenal të konsiderueshëm raketash balistike. Sipas analistit ushtarak Sean Bell, Teherani ka kapacitetin për të lëshuar valë të njëpasnjëshme raketash, duke u mbështetur te numri i madh si avantazh strategjik.

“Një raketë mund të mos depërtojë, as 10 të tjera. Por nëse lëshohen 100 apo 500, sasia në vetvete krijon efekt,” thekson ai, duke nënvizuar se mbingarkesa e sistemeve mbrojtëse mund të rrisë gjasat e goditjeve të suksesshme.

Izraeli mund të mos jetë objektivi i vetëm i mundshëm. Sipas Bell, Irani mund të synojë edhe objektiva amerikane në rajon, ku ndodhen dhjetëra baza ushtarake.

Një tjetër pikë e ndjeshme është Ngushtica e Hormuzit, një korridor kyç detar për tregtinë globale të energjisë. Irani ka zhvilluar së fundmi stërvitje me zjarr të vërtetë në këtë zonë, duke demonstruar aftësinë për ta bllokuar atë. Rreth 20% e naftës botërore kalon përmes kësaj ngushtice, çka do të thotë se çdo ndërprerje do të kishte ndikim të menjëhershëm në tregjet globale të energjisë.

Në fokus është gjithashtu edhe anija e re iraniane e dronëve, “Shaheed Bagheri”, e cila tashmë është futur në shërbim. Kjo platformë detare ka kapacitet të lëshojë një numër të madh dronësh luftarakë dhe ka operuar në afërsi të aeroplanmbajtëseve amerikane.

Sipas ekspertëve, edhe pse aeroplanmbajtëset amerikane kanë sisteme shumë të avancuara mbrojtjeje nga afërsia, një sulm i koordinuar me 20, 30 apo 50 dronë njëherësh mund të sfidojë seriozisht këto sisteme. Një veprim i tillë, edhe nëse nuk do të fundosë një aeroplanmbajtëse, do të përbënte një mesazh të qartë politik dhe ushtarak.

Nga ana tjetër, redaktorja për mbrojtjen dhe sigurinë Deborah Haynes thekson se mënyra se si Irani do ta interpretojë sulmin e fundit do të jetë vendimtare për shkallën e reagimit.

Sipas saj, Teherani ka gjasa ta ketë simuluar më parë një skenar të tillë në planifikimet e tij ushtarake. Irani disponon një rezervë të konsiderueshme raketash balistike, raketash lundruese dhe dronësh, duke pasur potencialin për të shkaktuar dëme të mëdha.

“Çelësi qëndron te fakti nëse regjimi do ta perceptojë situatën si kërcënim ekzistencial. Nëse po, reagimi mund të jetë maksimal,” thekson Haynes.

Megjithatë, mbetet për t’u parë nëse Irani ka ende kapacitet të plotë operacional, duke pasur parasysh operacionet e mëparshme ushtarake të zhvilluara kundër tij dhe ndikimin që ato mund të kenë pasur në rezervat dhe aftësitë e tij sulmuese.