Loading ...Komisioneri për Zgjerim në BE, Oliver Varhelyi bëhet zyrtari i dytë i lartë i Brukselit, pas Presidentit të Këshillit, Charles Michel, që mbështet anëtarësimin e vendeve të Ballkanit në vitin 2030.
“Ky është një mesazh nga Këshilli se dëshiron të angazhohet më në fund dhe të bëjë një hap të madh për të realizuar zgjerimin. Ky është një lajm i mirëpritur. Komisioni është i gatshëm të bëjë çdo propozim për të arritur atje dhe këtë do ta shihni tashmë në tetor, kur ne do të duam të bëjmë propozime thelbësore duke përfshirë Planin e Rritjes, që do të përshpejtojë edhe integrimin real. Integrimi real i njerëzve dhe i ekonomive në Bashkimin Evropian.”
Pas këtij qëndrimi mbështetës, ka reaguar Kryeministri Rama duke e duartrokitur personalisht Komisionerin Varheli.
“KOMISIONERI ynë që nuk e zhgënjeu kurrë rajonin tonë, veçanërisht në kohë të vështira. Duhet pranuar se pas fjalimit të papritur të Presidentit Michel në Forumin Strategjik të Bled, autobusi i ngadaltë i BE-së po bëhet një vend interesant për të qëndruar edhe pa një vend të lirë – pa dyshim që pasagjerët e Ballkanit Perëndimor mund të durojnë më mirë udhëtimin e zgjatur ndërsa ndjekin një bisedë me zë të lartë mes djemve të ulur”.
Shqipëria tashmë ka nisur zyrtarisht bisedimet për anëtarësim, dhe për momentin është duke u kryer procesi i analizës së legjislacionit, që njihet si screening.
