Tre persona janë ndaluar nga policia e Dibrës pasiakuzohen për kultivim të bimëve narkotike. Në kuadër të operacionit të koduar “Gracka” është bërë i mundur zbulimi i një minisere të vendosur në një zonë të pyllëzuar të fshatit Golevisht, ku brenda dyshohej se kultivoheshin bimë narkotike.
Në vijim të hetimeve me metoda proaktive janë siguruar prova ligjore për tre shtetas të cilët kishin kultivuar bimë narkotike në një miniserë dhe më pas do t’i transportonin në pyll, me kafshë pune, me qëllim mbjelljen e tyre në tokë.
Pas sigurimit të provave, Gjykata e Shkallës së Parë të Juridiksionit të Përgjithshëm Dibër ka lëshuar urdhrat e ndalimit për 3 shtetas, të cilat janë ekzekutuar menjëherë nga shërbimet e Policisë. Konkretisht janë ndaluar shtetasit 52 vjeç, 30 dhe 34 vjeç.
Nga hetimi proaktiv rezultoi se këta shtetas kishin kultivuar në një miniserë, dhjetra bimë narkotike, të cilat më pas kanë tentuar t’i transportojnë më kafshë pune, në pyll, me qëllim mbjelljen e tyre në tokë.
Gjithashtu, shërbimet e Policisë kanë ushtruar kontroll në banesën e një prej të ndaluarve ku kanë gjetur dhe sekuestruar 2 armë gjahu që ai i mbante pa leje.
Vijon puna për identifikimin dhe kapjen e shtetasve të tjerë të implikuar në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme./abcnews.al
