Nuk i përkasin kësaj epoke. Jo se nuk shkojnë në stadiume e nuk e ndjekin ekipin e zemrës, por mosha e tyre bën që të kenë distancë me ultrasit e sotëm.
Po flasim për tifozë që kanë nisur që në vitet 60-të e 70-të të shekullit të kaluar, dhe njëri nga më të njohurit e Partizanit është Agim Gjonça.
Ai për ABC-në komenton shanset e titullit dhe ka një këshillë për “Guerrilsat” e tanishëm.
“Ne jemi më të favorizuar se ekipi i Tiranës, se luajmë në fushën tonë, kemi komplet kontigjentin mes tifozerisë tonë. Ekipi kundërshtar Teuta pavarësisht se ka objektivin për të luajtur në kupat e Europës, nuk është me objektivin që ka Shijaku, që është për mbijetesë. Edhe guerrilsave edhe fanatiksave u them të jenë më të përmbajtur se gjithë dëmi që bëjnë ata, është në kurriz të presidentëve”
Si i duken Gjonçës dyshimet se Partizani po favorizohet këtë vit?
“ Ne para tre javësh në Lac, na është bërë një padrejtësi e madhe, ishte loja 1-0 për Partizanin dhe arbitri s’dha penallti për ne, dha gol absajt për Lacin dhe ne humbem tre pikë atë ditë. Dhe Tirana lunate atë ditë në Elbasan dhe nuk dha një penallti për Egnatian dhe aty u bë shkëputja që shkoi 5 pikë, ajo që dua të them është se Partizani nuk i vodhi gjë Tiranës, në përballjen direkte, në 4 takime ne kemi marrë 7 pikë ata 4 pikë”
Tek baraka e tij e zakonshme është tifozi i Tiranës, Muhamet Zalta. Njërin nga më të njohurit e më të zjarrtët bardheblu e gjen tek vendi që quhej “peshorja”, pranë Pazarit të Ri.
A shpreson ende ky “tirons” te titulli?
“ Ishall do Zoti modh, kemi pak shpresë. S’di pse ja bënë Tironës kështu, Tirona duhet të ishte kampion. Është turp, nuk është hera e parë që ia bëjnë Tironës. Ka lujt me dinjitet, kanë lujt me shpirt.
Reagimi i Zaltës është i kundërt me atë të Gjonçajt lidhur me atë që ndodhi në Rrogozhinë.
“ Ajo ishte penallti e jep faull kundra Tironës, dhe lojtari duhet të merrte të kuqe.”
