Procesi i normalizimit të marrëdhënieve ndërmjet Kosovës dhe Serbisë duhet të përmbyllet me njohje të ndërsjellë, ka deklaruar administratorja e Agjencisë Amerikane për Zhvillim Ndërkombëtar (USAID), Samantha Power.
Këtë deklaratë ajo e bëri në një konferencë për media, bashkë me kryeministrin e Kosovës, Albin Kurti, shkruan REL.
Power theksoi se aktualisht është e rëndësishme që palët të përqendrohen në detyrimet që dalin nga Marrëveshja për normalizmin e marrëdhënieve, siç është themelimi i Asociacionit të komunave me shumicë serbe.
“Përqendrimi i Shteteve të Bashkuara të Amerikës është në zbatimin e kornizës për normalizimin e marrëdhënieve ndërmjet Kosovës e Serbisë. Gjithmonë ka qenë qëndrim i Shteteve të Bashkuara se kjo duhet të rezultojë me njohje të ndërsjellë dhe natyrisht ky vazhdon të jetë qëndrimi ynë. Por, tani për tani kemi një përqendrim të posaçëm në rëndësinë e Asociacionit të komunave me shumicë serbe, si dhe rëndësinë e kthimit të serbëve të Kosovës në institucione, sa më parë që të jetë e mundur”, tha Power.
Ajo theksoi se përparimi në çështjet si themelimi i Asociacionit do të hapte rrugë për përparim në shumë çështje të tjera dhe se për këtë ekziston uniteti i Bashkimit Evropian dhe Shteteve të Bashkuara të Amerikës.
